Նախկին ՔՊ-ական պատգամավոր Հակոբ Ասլանյանի հետ միջադեպի գործով դատական նիստում այսօր պաշտպանական կողմը ներկայացրեց պաշտպանական ելույթը:
«Նախորդ նիստին մեզ վերջնականապես պարզ դարձան մեղադրանքի մանրամասները: Մեղադրանքում նկարագրված փաստերը դուրս են ռաբաթի գործողությունների ծրագրի (Ռաբաթի գործողությունների ծրագիրը ընդունվել է ՄԱԿ-ի Մարդու իրավունքների գերագույն հանձնակատարի գրասենյակի կողմից՝ «ազգային և տարածաշրջանային մակարդակներում խտրականության, թշնամանքի կամ բռնության հրահրում պարունակող ազգային, ռասայական կամ կրոնական ատելության քարոզչության մասին օրենսդրության, իրավագիտության և քաղաքականության իրականացման համապարփակ գնահատում կատարելու առումով.-խմբ.) տիրույթից, բացակայում է քաղաքական հայացքներով պայմանավորված լինելու հատկանիշը: Եթե մեղադրանքում նկարագրված փաստերը, այնուհանդերձ, ներառված լինեին ռաբաթի գործողությունների ծրագրի տիրույթում, ապա միեւնույն է՝ դրանք չէին համապատասխանի այդ ծրագրերի թե բուն նպատակին, թե բազմիցս հանրային մեղադրող պարոն Ավետյանի կողմից մանրամասն անդրադարձի արժանացած 6 քայլանոց թեստին: Բացակայում է ծանրացնող հանգամանքը, Սամվել Վարդանյանի ցուցմունքները պետք է համարվեն արժանահավատ, մենք չենք ունեցել բավարար հնարավորություններ մեղադրանքից պաշտպանվելու համար»,- ասաց պաշտպաններից Ռուբեն Մելիքյանը:
Փաստաբանը հղում արեց ՄԱԿ-ի մարդու իրավունքների գլխավոր հանձնակատարի 2013-ին հրապարակված զեկույցին, որը ներառում է ռաբաթի գործողությունների ծրագիրը: Նա նկատեց, որ այս փաստաթուղթը որեւէ կերպ չի առնչվում քաղաքական պատճառներով, նույնիսկ քաղաքական հայացքներով պայմանավորված դեպքերին: Ըստ փաստաբանի՝ այս փաստաթուղթը վերաբերում է բացառապես ազգային, ռասսայական կամ կրոնական հիմքերով իրականացվող ատելության խոսքին:
Ռուբեն Մելիքյանը անդրադարձավ նաեւ նախորդ նիստում հանրային մեղադրողի հիշատակած՝ Մարդու իրավունքների եվրոպական դատարանի (ՄԻԵԴ) մի շարք որոշումներին եւ հարց տվեց. «Էդ ի՞նչ ՄԻԵԴ-ի որոշումների մասին է խոսքը, որոնք քաղաքական հիմքերով նախատեսում են ռաբաթի գործողությունների ծրագրի որեւէ կիրառում»:
Կարդացեք նաև
Հիշեցնենք, որ Սամվել Վարդանյանը մեղադրվում է նախկին իշխանական պատգամավոր Հակոբ Ասլանյանի նկատմամբ խուլիգանություն անելու և համացանցում ատելություն հրահրող հրապարակային խոսք տարածելու համար։
Համացանցում տարածված տեսանյութի համաձայն՝ 2024 թվականի ապրիլի 15-ին Սամվել Վարդանյանը հանրային տրանսպորտում նկատել է ԱԺ պատգամավոր Հակոբ Ասլանյանին և նրա հասցեին հնչեցրել «հակահայ վիժվածք», «ժեխ բիձա» եւ նմանատիպ այլ արտահայտություններ:
Հիշեցնենք նաեւ, որ պատգամավորի հետ ունեցած միջադեպից հետո Սամվել Վարդանյանը ձերբակալվել ու ոստիկանների կողմից խոշտանգման էր ենթարկվել:
Արփինե ՍԻՄՈՆՅԱՆ
