Լրահոս
Օրվա լրահոսը

Դեսպան Տոլմաջյանը բարձր է գնահատել նաև ԱՄԿ աջակցությունը ինտեգրման և կայուն զբաղվածության ապահովման ուղղությամբ՝ մասնավորապես ԼՂ փախստականների համար

Մարտ 26,2025 13:25

Լսել նյութի աուդիո տարբերակը

Ձայնագրությունը գեներացված է Armenian Text to Speech արհեստական բանականության միջոցով, որն այս պահին գտնվում է թեստավորման փուլում

Ս․թ․ մարտի 25-ին Ժնևի ՄԱԿ-ի գրասենյակում և այլ միջազգային կազմակերպություններում Հայաստանի Հանրապետության մշտական ​​ներկայացուցիչ, դեսպան Հասմիկ Տոլմաջյանը քաղաքավարական հանդիպում է ունեցել Աշխատանքի միջազգային կազմակերպության (ԱՄԿ) գլխավոր տնօրեն Ժիլբեր Հունգբոյի հետ։

Հանդիպման ընթացքում կողմերը քննարկել են համագործակցության առանցքային ոլորտները, որոնք ուղղված են սոցիալական արդարության, արժանապատիվ աշխատանքի և կայուն զարգացման խթանմանը: Դեսպան Տոլմաջյանն ընդգծել է աշխատանքային և սոցիալական իրավունքները, ինչպես նաև եռակողմ գործընկերությունը ամրապնդելու Հայաստանի հանձնառությունը՝ ԱՄԿ գլոբալ առաքելությանը համապատասխան:

Հայաստանի դեսպանը շնորհակալություն է հայտնել ԱՄԿ-ին մի շարք ոլորտային ուղղություններով երկարամյա արդյունավետ համագործակցության և աջակցության համար, որը ներառում է, ի թիվս այլոց, փորձագիտական ​​աջակցություն, խորհրդատվություն և կարողությունների զարգացում աշխատանքի և զբաղվածության ազգային օրենսդրության բարելավման և Հայաստանում աշխատանքային իրավունքների ամրապնդման համար՝ դրանք լիովին համապատասխանեցնելու ԱՄԿ կոնվենցիաների շրջանակներում ստանձնած Հայաստանի միջազգային պարտավորություններին: Դեսպանը բարձր է գնահատել նաև ԱՄԿ աջակցությունը ինտեգրման և կայուն զբաղվածության ապահովման ուղղությամբ՝ մասնավորապես ԼՂ փախստականների համար։

Գլխավոր տնօրենը բարձր է գնահատել Հայաստանի ջանքերը աշխատանքային չափանիշների ներդրման և սոցիալական արդարության ամրապնդման ուղղությամբ և կարևորել գործընկերության խթանումը արդի մարտահրավերների լուծման համար, ինչպիսիք են գործազրկությունը, գենդերային անհավասարությունն ու սոցիալական անարդարությունը:

Գլխավոր տնօրենը շնորհակալություն է հայտնել նաև ԱՄԿ նախաձեռնություններին Հայաստանի ներդրման համար, այդ թվում՝ «Հանուն սոցիալական արդարության գլոբալ կոալիցիայի» շրջանակներում, որին Հայաստանը միացել է առաջիններից ԱՄԿ անդամ պետությունների շարքում։

Կողմերը երկուստեք արտահայտել են ապագայի վերաբերյալ իրենց ընդհանուր տեսլականը, որտեղ հավասար աշխատանքային իրավունքներն ու սոցիալական երկխոսությունը ճանապարհ են հարթում դեպի դիմակայուն և ներառական հասարակություններ:

Հանդիպումն ավարտվել է արժանապատիվ աշխատանքի և սոցիալական արդարության սկզբունքների առաջմղման փոխադարձ հանձնառության վերահաստատմամբ՝ ընդգծելով միջազգային համագործակցության կարևորությունը այդ նպատակներին հասնելու գործում։

 

Ժնևի ՄԱԿ-ի գրասենյակում և այլ միջազգային կազմակերպություններում Հայաստանի Հանրապետության մշտական ներկայացուցչություն

 

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Մարտ 2025
Երկ Երե Չոր Հնգ Ուրբ Շաբ Կիր
« Փետ    
 12
3456789
10111213141516
17181920212223
24252627282930
31