«Պետական մակարդակով ատելությունն արցախցիների նկատմամբ ավելանում է: Նույնիսկ մեր պաշտոնյաների նկատմամբ էլ կատարվեց այդ ատելությունը, հետապնդումներ ՝ սկսած մեր նախագահից մինչեւ մեր քաղաքապետեր: Դրա համար դրան չեմ վստահում, օր օրի վաճառում է Հայաստանը, Ջերմուկի մասը, կեսը չկա, նույնը շարունակվում է Գեղարքունիքից, Սյունիքից, վերջերս էլ Տավուշից: Ստից խաղաղություն է մուրում, գիշեր-ցերեկ մուրում է խաղաղություն, ի՞նչ խաղաղության մասին է խոսքը, եթե դու ունես գերիներ, եթե դու ունես կորսված հայրենիք՝ Արցախ չկա, Հայաստանի մի մասը չկա: Անցած տարի ամռանն էր, հիշում եմ՝ գտնվում էր ՄԱԿ-ի գագաթաժողովում, այնտեղից էլի մուրում էր խաղաղություն, ոչ մի խոսք գերիների մասին: Ո՞նց սատարեմ այս իշխանություններին: Դրա համար եկել եմ, որ ասեմ, որ չեմ վստահում նրան ու նրա խունտային»,- այսօր «Սրբազան պայքար» շարժման անդամների «Չեմ վստահում Նիկոլ Փաշինյանի իշխանությանը» բողոքի ակցիայի ժամանակ ասաց Արցախի խորհրդարանի պատգամավոր Նելա Գրիգորյանը՝ մասնակցելով անվստահության քվեարկությանը:
Տարբեր քաղաքացիներ, որոնք իրենց անվստահությունն էին հայտնում ակցիային մասնակցելով, իշխանությունների՝ մասնավորապես Փաշինյանի հասցեին նաեւ գրություններ էին թողնում թերթիկների վրա՝ սկսած վիրավորական խոսքերից մինչեւ ամոթանք:
Մի քաղաքացի էլ ասաց, թե չի կարող դեմ չլինել այս իշխանություններին, որովհետեւ. «Կերան մեզ: Բա մենք այսպիսի՞ Հայաստան ենք տվել»:
Արփինե ՍԻՄՈՆՅԱՆ
