«Երբ լրագրողների նկատմամբ նման վարք է ցուցաբերվում, դա կարող են անել միայն այն մարդիկ, որոնք պետությունը քանդել են: Օրինակ, Արցախի Հանրապետությունը նրանք քանդել են: Սերժ Սարգսյանի ժամանակ, երբ Մհեր Սեդրակյանը՝ Թոխմախի Մհերը, կամ Առաքել Մովսիսյանը՝ Շմայսը վիրավորում էին լրագրողներին, Հանրապետական կուսակցությունը ստեղծեց Էթիկայի հանձնաժողով, որպեսզի զսպի այդ մարդկանց ոչ պատշաճ կեցվածքից: Բայց սրանք եկան եւ վերացրին էթիկայի հանձնաժողովը»,-«Հայելի» ակումբում նշեց հանրային գործիչ, վավերագրող Հովհաննես Իշխանյանը՝ անդրադառնալով լրագրողի հանդեպ Անդրանիկ Քոչարյանի պահվածքին:
«Սարգիս Խանդանյանը, որը ժամանակին լրատվամիջոցում լավ տղա էր, բայց իշխանության մեջ դարձավ դավաճան, կողմ էր նրան, որ այդ էթիկայի հանձնաժողովը չլինի: Բացի Անդրանիկ Քոչարյանից, սրանք Քրիստինե Պողոսյան ունեն, Հայկ Կոնջորյան, Արթուր Հովհաննիսյան…նաեւ Ալեն Սիմոնյանը կա, Նիկոլ Փաշինյանը՝ լինելով լրագրող, եկավ ու առաջինը սկսեց լրագրողների հանդեպ ճնշումները…Այս պարագայում, երբ լրագրողական համայնքը համերաշխություն հայտնելու ձեւը չի գտնում, սրանք հաբռգում են»,-հավելեց Հովհաննես Իշխանյանը:
Նաեւ ընդգծեց, որ Անդրանիկ Քոչարյանից որեւէ մեկը պետք է հարցազրույց չվերցնի, մինչեւ նա ներողություն չխնդրի Հռիփսիմե Ջեբեջյանից, ում վիրավորել է եւ ողջ լրագրողական համայնքից:
Ինչ վերաբերվում է Նիկոլ Փաշինյանի հայտարարությանը, թե ոչինչ չի զիջել, Հովհաննես Իշխանյանն այսպես արձագանքեց. «Մեր զինվորները զոհվել են Հայաստանի ինքնիշխանության համար, իսկ սրանք զոհել են տղաներին՝ իրենց իշխանության պահպանման համար: Սրանք գրկում են այն մարդկանց գրքերը, տալիս են մեր զինվորների պահած տարածքները նրանց, ովքեր մեզ զրկում են ինքնիշխանությունից»:
Կարդացեք նաև
Խաղաղության համաձայնագրի մասին էլ Հովհաննես Իշխանյանն ասաց, որ Փաշինյանը «ցեղասպանության պայմանագիր» է ուզում ստորագրել. «Եթե սրա համար նպատակը Հայաստանի վերացումն է, կարող է նաեւ միակողմանի ստորագրել: Ո՞վ է այդ փաստաթուղթը երաշխավորելու, Ալեն Սիմոնյա՞նը, թքելո՞վ է պաշտպանելու երկիրը…»:
Գոհար ՀԱԿՈԲՅԱՆ
