Ականատեսի օրագիր N9
Քարոզչանյութերի մասին
Նախընտրական քարոզարշավը Գյումրիում թեժ փուլում է։ Մասնակից քաղաքական ուժերի մեծ մասը տարածում են քարոզչական տպագիր նյութեր։ Այս նյութերը, սակայն, հաճախ կիրառվում են օրենքի պահանջների խախտմամբ,
քանի որ՝
- փակցվում են չսահմանված կամ արգելված վայրերում՝ բազմաբնակարան շենքեր, լուսասյուներ, առևտրի կետեր, այլ հասարակական տարածքներ,
- չեն պարունակում օրենքով պահանջվող մակնշում՝ տեղեկատվություն տպաքանակի, տպարանի, պատվիրատուի վերաբերյալ,
- գերկենտրոնացած են մեկ վայրում՝ առանձին կուսակցությունների քարոզչական պաստառներ ծածկում են ամբողջական փողոցներ՝ հնարավորություն չտալով այլ ուժերին ներկայացված լինել տվյալ տարածքում,
- ասոցացվող են՝ պատրաստվում ու տարածվում են քաղաքական ուժերի հետ ասոցացվող երրորդ անձանց կողմից՝ անհնարին դարձնելով քարոզչանյութերի համար կատարվող ծախսերի վերահսկողությունը։
Օրենքի դրույթների խախտմամբ փակցված քարոզչանյութերը պետք է հեռացվեն համայնքի ղեկավարի կողմից, անհրաժեշտության դեպքում` ոստիկանության աջակցությամբ։ Սակայն այս լիազորությունը ևս մեծ մասամբ չի իրագործվում։
Կարդացեք նաև
Որոշ քարոզչանյութեր վնասվել են մարտի 24-ին՝ «Սրբազան պայքար» շարժման կողմից՝ վերջինիս «Չեմ վստահում» նախաձեռնության՝ Գյումրի կատարած այցի ընթացքում։ Հարկ է նկատել, որ ՀՀ ընտրական օրենսգրքի 21-րդ հոդվածն արգելում է քարոզչանյութերը որևէ եղանակով վնասելը: Վարչական իրավախախտումների վերաբերյալ ՀՀ օրենսգրքի 40-րդ հոդվածի 11-րդ կետը 50.000-100.000 ՀՀ դրամ տուգանք է նախատեսում նախընտրական ժամանակահատվածում քարոզչանյութերի համար առանձնացված տեղերում փակցված քարոզչական պաստառները դիտավորյալ վնասելու համար։
«Ականատես» դիտորդական առաքելություն
