Երեւանի քաղաքապետարանի հայտարարած Կասկադ համալիրի վերակառուցման «Կասկադ մշակութային հանգույց» նախագծի իրականացման համար հայտարարված բաց մրցույթում հաղթող էր ճանաչվել «Ջի Թի Բի դիվելոփմենթ» ՍՊԸ-ն: Այն 4 ընկերություններից բաղկացած կոնսորցիում է, որը հիմնադրվել է 2024 թ., եւ այստեղ գլխավոր շահառուն «Հանրապետություն» կուսակցության նախագահ Արամ Սարգսյանի եղբոր՝ Արմեն Սարգսյանի փեսա Գրիգոր Տեր-Ղազարյանն է 97.5 % մասնակցությամբ: Նա նախկինում դատապարտված է եղել խարդախության համար։
Հայաստանի ճարտարապետների պալատը կասկածահարույց էր համարել, որ հենց «Ջի Թի Բի դիվելոփմենթն» է հաղթող ճանաչվել մրցույթում, նաեւ բաց նամակ էր հրապարակել, որտեղ ի թիվս այլնի՝ նշել էր, որ Կասկադ համալիրը հանդիսանում է Երեւանի մշակութային ժառանգության բացառիկ նմուշներից մեկը, այն Երեւանի քաղաքաստեղծ հանգույցներից է եւ որպես քաղաքային դոմինանտ կառույց՝ ամբողջ քաղաքի ծավալատարածական հորինվածքի համար թելադրող դիրք ունի, ու Ալեքսանդր Թամանյանի մշակած գլխավոր հատակագծի հորինվածքային առանցքի կարեւոր մասն է կազմում:
Նշենք, որ «Կասկադ մշակութային հանգույց» նախագծի թեմայով քննարկումն անցավ դռնփակ: Նիստի ավարտից հետո ճարտարապետ Անահիտ Թարխանյանը նշեց, որ քննարկման ժամանակ հիմնական հարցերը կապված էին Կասկադի հեղինակային իրավունքների եւ գործող հեղինակ՝ վաստակավոր ճարտարապետ Ասլան Մխիթարյանի մասնակցությանը՝ տվյալ նախագծին: Նա նաեւ տեղեկացրեց, որ Սարգիս Գուզադյանի, Ջիմ Թորոսյանի հարազատները ներկայացուցիչ են ընտրել Կարեն Բալյանին, որը կմասնակցի նախագծի զարգացմանը: Հավելեց, որ երբ էսքիզային նախագիծը պատրաստ լինի, հանրային քննարկում կլինի, ու առաջինը կքննարկվի ճարտարապետների պալատում:
Գոհար ՀԱԿՈԲՅԱՆ
Կարդացեք նաև
Լուսանկարը՝ Վիքիպեդիայից
