Մարտի 21-ին Երևանում կայացավ «Պաշտպանելով Սևանա լիճը. կայուն լուծումներ և ներդրումային ռազմավարություններ» խորագրով աշխատաժողովը, որը կազմակերպվել էր Շրջակա միջավայրի նախարարության, Տարածքային կառավարման և ենթակառուցվածքների նախարարության Ջրային կոմիտեի և Ասիական զարգացման բանկի (ԱԶԲ) համագործակցությամբ։ Միջոցառմանը մասնակցում էին պետական պաշտոնյաներ, միջազգային ու տեղական փորձագետներ, բնապահպանական կազմակերպությունների ներկայացուցիչներ և քաղաքացիական հասարակության անդամներ։
Աշխատաժողովի նպատակն էր քննարկել Սևանա լճի էկոհամակարգի պահպանության հրատապ խնդիրները, ներկայացնել կլիմայի փոփոխության ազդեցության վերաբերյալ հետազոտությունները և մշակել կլիմայադիմակայուն զարգացման ու ֆինանսավորման երկարաժամկետ ռազմավարություններ։
Բացման խոսքով հանդես եկան Շրջակա միջավայրի նախարարի տեղակալ Արամ Մեյմարյանը, Ջրային կոմիտեի նախագահի տեղակալ Մարտիրոս Նալբանդյանը և ԱԶԲ-ի հայաստանյան մշտական առաքելության տնօրեն Դոնալդ Լամբերտը։
Կարդացեք նաև
Իր ելույթում Արամ Մեյմարյանը ընդգծեց, որ առաջնային խնդիր է լճի ավազանի կլիմայադիմակայուն և ցածր ածխածնային զարգացման խթանումը և այս նպատակով անհրաժեշտ է՝
- Մշակել գիտականորեն հիմնավորված հարմարվողականության ծրագրեր,
- Իրականացնել կենսունակ ֆինանսավորման և ներդրումային ռազմավարություններ,
- Արդիականացնել ենթակառուցվածքները, մասնավորապես՝ կեղտաջրերի մաքրման համակարգերը,
- Խթանել մաքուր էներգիայի աղբյուրների կիրառումը,
- Ներգրավել հանրությունը և բարձրացնել իրազեկվածությունը։
Աշխատաժողովի ընթացքում ներկայացվեցին Սևանա լճի էկոլոգիական վիճակի, կլիմայի փոփոխության ազդեցության և հարմարվողականության անհրաժեշտության վերաբերյալ վերլուծություն, խոսվեց լճի էկոհամակարգային ծառայությունների տնտեսական արժեքի և սանիտարական լուծումների ֆինանսական կայունության մասին, ինչպես նաև ներկայացվեցին սանիտարական և կեղտաջրերի մաքրման լավագույն տեխնոլոգիաները՝ հատուկ ուշադրություն դարձնելով ցածր ածխածնային լուծումներին։
Աշխատաժողովին ներկայացվեց «Սևանա լճի ոչ նյութական արժեքը։ Հանրային հարցման ամփոփում. Ի՞նչ է Սևանը Հայաստանի համար» թեմայով սոցիոլոգիական ուսումնասիրության արդյունքները, որին հաջոդեցին հարցուպատասխանն ու պանելային քննարկումը։
Պանելային քննարկման ընթացքում պետական և տեղական ինքնակառավարման մարմինների, ֆինանսական հաստատությունների ու քաղաքացիական հասարակության ներկայացուցիչները քննարկեցին, թե ինչպես կամրջել ֆինանսավորումը և էկոհամակարգի պաշտպանությունը՝ ապահովելով Սևանա լճի կայուն ապագան։
Աշխատաժողովի ավարտին ամփոփվեցին քննարկումների հիմնական արդյունքները և ներկայացվեցին հաջորդ քայլերը՝ ուղղված Սևանա լճի պահպանությանն ու կլիմայադիմակայուն զարգացման ապահովմանը։
ՀՀ ՇՐՋԱԿԱ ՄԻՋԱՎԱՅՐԻ ՆԱԽԱՐԱՐՈՒԹՅՈՒՆ
