ԱԺ Եվրոպական ինտեգրման հարցերի մշտական հանձնաժողովի նիստում այսօր հավանության արժանացավ Եվրոպական միությանը ՀՀ անդամակցելու գործընթացի մեկնարկի մասին օրենքի խմբագրված նախագիծը, որն ընդգրկվեց առաջիկայում մեկնարկելիք քառօրյա նիստերի օրակարգ։
Արմեն Գեւորգյան
«Հայաստան» խմբակցության պատգամավոր Արմեն Գեւորգյանը հարցրեց՝ վերջին քննարկումից 3 շաբաթ է անցել, արդյոք ԵՄ գործադիր մարմիններից պաշտոնական արձագանք կա՞ այս նախաձեռնության վերաբերյալ։
ԱԳ փոխնախարար Պարույր Հովհաննիսյանն ասաց, որ պաշտոնական արձագանքը միայն Հայաստան-ԵՄ խորհրդարանական համագործակցության կոմիտեի ընդունած որոշումներում է։ «Բրյուսելում, ըստ երևույթին, սպասում են երկրորդ ընթերցմամբ օրենքի ընդունմանը, ապա պետք է ակնկալել արձագանք։ Եվրոպական արտաքին գործողությունների ծառայությունից պաշտոնապես հայտնել են, որ սպասում են օրենքի ընդունմանը»,- ասաց Պարույր Հովհաննիսյանը։
Մանրամասները՝ տեսանյութում
Կարդացեք նաև
Արմեն Գեւորգյանը նաեւ հարցրեց՝ անվտանգության ոլորտում Հայաստանի ակնկալիքները ԵՄ-ից որո՞նք են։
Արտակ Զեյնալյան
Նախագծի համահեղինակ Արտակ Զեյնալյանը պատասխանեց․ «Այն ապահովությունը, որը կա ԵՄ-ում, մենք ակնկալում ենք ԵՄ անդամակցության գործընթացի ընթացքում ստանալ։ Իսկ ՀՀ-ն, երբ կանդամակցի Եվրամիությանը, կդառնա այն նույն անվտանգության համակարգի մաս, ինչ կունենա Եվրոպական միությունը»։
Արտաքին գործերի փոխնախարար Պարույր Հովհաննիսյանն ասաց, որ ԵՄ-ն Հայաստանի համար դառնում է առավել կարեւոր գործընկեր անվտանգության ոլորտում։ «Մեկնարկել ենք քաղաքական եւ անվտանգության երկխոսություն ԵՄ հետ, արդեն տեղի է ունեցել երկու նիստ։ Քննարկում ենք այլ ձեւաչափեր այդ երկխոսության հովանու ներքո, որտեղ պաշտպանության եւ անվտանգության հարցերի շուրջ առավել ակտիվ աշխատանքներ պետք է սկսվեն։ Դրանով է պայմանավորված, որ այժմ քննարկվելիք գործընկերության նոր օրակարգում անվտանգությանն առաջին անգամ հատկացված է մեծ մաս, առանձին գլուխ է դրա վերաբերյալ, այդ ոլորտը նախկինում չկար CEPA-ում (Հայաստան-ԵՄ համապարփակ և ընդլայնված գործընկերության համաձայնագիր.-խմբ.)։ Իհարկե, դրա հետ են կապվում նաեւ Եվրամիության ընդհանուր եւ անվտանգային պաշտպանական քաղաքականության ներքո գործող առաքելությունների գործողությունները։ Եվ այժմ պատրաստ է ստորագրության պայմանագիր, որը պետք է ստորագրվի առաջիկայում։ Միաժամանակ, իհարկե, Եվրամիության դիտորդների ներդրումը նույնպես անվտանգության ոլորտում պետք է դիտարկվի՝ որպես կարեւորագույն գործոն։ ԵՄ-ում լուրջ քննարկումներ են այժմ ընթանում՝ առավել ամրապնդելու այդ ոլորտը, որը նոր հեռանկարներ կբացի ԵՄ հետ հենց այս ոլորտում համագործակցության համար»,- նշեց Պարույր Հովհաննիսյանը։
Նա հավելեց, որ պաշտպանության ոլորտում արդեն կա շատ կոնկրետ շոշափելի ծրագիր՝ դա եվրոպական խաղաղության գործիքից օգտվելու հնարավորությունն է։ «Մենք երկրորդն հայտն ենք արդեն ներկայացրել այս տարվա համար, եւ ՊՆ հետ ընթանում է բավականին ակտիվ աշխատանք»,- ընդգծեց նա։
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
