«Տունկի բուն աշխատանքները սկսել ենք իրականացնել փետրվարի երկրորդ կեսից, ձմեռային հատվածում առաջին անգամ Երևանում իրականացվել է մշտադալարների տունկ: Երեւանում տնկվել են մշտադալար 250 հասուն ծառատեսակներ, հիմնականում սոճիներ եւ եղեւնիներ:
Մարտի 10-ից Երեւանում մեկնարկել են նաեւ սանիտարական էտի եւ ձեւավորման աշխատանքները, ըստ տրանսպորտի վարչության տված տվյալների՝ իրականացվում են ավտոբուսային երթուղիներին խանգարող փողոցներում ծառերի սանիտարական էտի աշխատանքներ»,-Երեւանի քաղաքապետարանի գործակարգավարական խորհրդակցության ժամանակ նշեց «Կանաչապատում եւ շրջակա միջավայրի պաշտպանություն» ՀՈԱԿ-ի տնօրեն Արմեն Բեգոյանը: Նիստը վարում էր ոչ թե քաղաքապետ Տիգրան Ավինյանը, այլ Երեւանի քաղաքապետի տեղակալ Արմեն Փամբուխչյանը:
«Ներառված են նաեւ 300 բակեր՝ բնակիչների դիմումների հիման վրա, 19 այգիներ եւ 18 փողոցներ եւ պողոտաներ»,-հավելեց Արմեն Բեգոյանը: Նա նշեց, որ էտի աշխատանքները նախատեսված է իրականացնել մարտի 10-ից մինչեւ ապրիլի 10-ը, սակայն հաշվի առնելով եղանակային պայմանների կտրուկ տաքացումը՝ հնարավոր է, որ քաղաքի հարավային շրջաններում էտի աշխատանքներն ավարտվեն ապրիլի 1-ին:
Կարդացեք նաև
Արմեն Բեգոյանը նաեւ տեղեկացրեց, որ մարտի 20-ից սկսվել է կենսունակությունը կորցրած կամ դրա ավարտին մոտ գտնվող խիստ դեֆորմացված, ծեր, հիվանդ ծառերի փոխարինման աշխատանքները Թումանյան փողոցում. «Թումանյան փողոցում 60 տոկոսից ավելին դեռեւս անցյալ տարվանից էր իրականացվել, այս տարի իրականացվել է մնացած հատվածը: Թումանյան փողոցը բերվել է վերջնական տեսքի: Փողոցից հեռացվել են բացառապես թեղի տեսակի ծառատեսակները, փորձել ենք պահպանել միայն 30՝ քիչ թե շատ վտանգավորության աստիճան չունեցող թեղիները, որոնք ըստ մասնագետների այս պահին չունեն տապալման վտանգ…Նշված հատվածից հեռացվել է 80 ծառ, տնկվել է ցերսիս տեսակի 90 ծառատեսակ, լրացուցիչ բացվելու է 34 բնաբաժակ, որոնք տարբեր տարիների տնտեսվարողների կողմից փակվել էին»:
Մանրամասն տեսանյութում
Գոհար ՀԱԿՈԲՅԱՆ
Լուսանկարները՝ Նինա Ստեփանյան-Ղանդիլյանի ֆեյսբուքյան էջից
