Գեղարքունիքի մարզի առաջին ատյանի ընդհանուր իրավասության դատարանի Սևան քաղաքի նստավայրում այսօր շարունակվեց Ազատ գյուղի զինվորական կացարանում զոհված 15 զինծառայողների գործով դատական նիստը:
Մեղադրյալներից Եղիշե Հակոբյանն այսօր առարկեց հրապարակային դատաքննությանը, դատարանը չթույլատրեց տեսանկարահանումն ու ձայնագրումը:
Նիստից հետո տուժողների ներկայացուցիչ, փաստաբան Նորիկ Նորիկյանը Aravot.am-ին ասաց, որ այսօր նիստին հարցաքննվել է գործով վկա, դեպքի վայրում հրշեջների խմբի հրամանատարը. «Այդ անձի ցուցմունքով եւս մեկ անգամ պարզ դարձավ, որ դեպքի վայրը խախտվել է: Այդ խախտումն իրականացվել է ՀՀ օրենսդրության կոպտագույն խախտումներով: Քննչական խմբին հնարավորություն չի տրվել, որ հասնի ժամանակին ու իրականացնի անհետաձգելի քննչական միջոցառումներ: Դեռ պետք է պարզել՝ քննչական մարմինը դիտավորյա՞լ է ուշ եկել, թե՞ օբյեկտիվ պատճառներից ելնելով…. թե՛ հրշեջ ծառայության, թե՛ ռազմական ոստիկանության, թե՛ քննչական մարմինների, թե՛ զորամասի զինված ուժերի համապատասխան հրամանատարական կամ ստորաբաժանումների բարձրաստիճան ներկայացուցիչների կողմից կոպտորեն խախտվել են իրենց իրավասությունների շրջանակում իրենց վրա դրված պարտականությունները: Ինչի արդյունքում խախտվել է դեպքի վայրը, ինչի արդյունքում չենք բացառում, որ ոչնչացվել են շատ կարեւոր հետքեր, որոնք կարող էին լույս սփռել այս ողբերգության ամբողջական պատկերի վրա»:
Փաստաբանի խոսքով, այսօր նաեւ քննարկվել է երկու մեղադրյալներ Գոռ Ալեքյանի եւ Մառլեն Սարգսյանի խափանման միջոց կալանքը փոխելու հարցը: Դատարանի որոշմամբ ՝ կալանքը փոխարինվել է տնային կալանքով:
Կարդացեք նաև
Արփինե ՍԻՄՈՆՅԱՆ
