Գեղարքունիքի մարզի առաջին ատյանի ընդհանուր իրավասության դատարանի Սևան քաղաքի նստավայրում այսօր շարունակվեց Ազատ գյուղի զինվորական կացարանում զոհված 15 զինծառայողների գործով դատական նիստը:
Մեղադրյալներից Եղիշե Հակոբյանն այսօր առարկեց հրապարակային դատաքննությանը, դատարանը չթույլատրեց տեսանկարահանումն ու ձայնագրումը:
Նիստից հետո տուժողների ներկայացուցիչ, փաստաբան Նորիկ Նորիկյանը Aravot.am-ին ասաց, որ Եղիշե Հակոբյանի խնդրանքով որոշ ժամանակ առաջ ինքը ու Հակոբյանի պաշտպանն այցելել են «Վարդաշեն» ՔԿՀ, տեղի է ունեցել մեկ ժամից ավելի տեւողությամբ հանդիպում:
«Որոշակի հանգամանքների վերաբերյալ Եղիշե Հակոբյանը տվել է որոշակի տեղեկություններ, դրանք ճիշտ պահին կդարձնենք հանրության սեփականություն: Այն քարոզարշավն ու շոուն, որ իրականացվում է Եղիշեի անձի նկատմամբ, փորձ է արվում հանրության մոտ ձեւավորել տպավորություն, որ այս գործով Եղիշեի մեղավորությունը հիմնավորված չէ: Պետք չէ չմոռանալ, որ ՀՀ-ում արդարադատությունը իրականացվում է միայն դատարանի կողմից:
Կարդացեք նաև
Պետք է զերծ մնանք ավելորդ պիտակավորումներից, հարգենք զոհված 15 զինծառայողների հիշատակը:
Եթե ինքն անմեղ է կամ գտնում է, որ այն պաշտոնական մեղադրանքը չի համապատասխանում իրականությանը, ինքը պետք է խոսի, ասի ճշմարտությունը՝ ինչ է տեղի ունեցել իրականում:
Բայց մենք տեսնում ենք հակառակ պատկերը: Ի դեմս Եղիշեի, տեսնում ենք, իրականությունը թաքցնելուն միտված վարքագծի դրսեւորում: Եթե բան կա ասելու, ձեզ ոչ մեկը չի խոչընդոտում, որ ասեք:
Հանրությանը տրամադրվում է սխալ տեղեկատվություն, հանրության մոտ ձեւավորվում է խեղճ անձի կերպար, որը չի կարող ունենալ դրական հետեւանքներ»,- ասաց փաստաբանը:
Արփինե ՍԻՄՈՆՅԱՆ
