«Հենց այդ տղան էլ է ինձ հայհոյել, որ ձեռները գրպանը գցած քայլում է»,- ՀՀ Քննչական կոմիտեի դիմաց լրագրողներին ասաց ոստիկանների կողմից ծեծի ենթարկված արցախցի երիտասարդ Տիգրան Ուլուբաբյանը՝ մատնացույց անելով մի անձի, որը դուրս եկավ Քննչական կոմիտեից։
Ինչպես արդեն տեղեկացրել ենք, այսօր տեղի է ունենալու Տիգրան Ուլուբաբյանի և նրան ծեծի ենթարկած ոստիկանների առերես հարցաքննությունը։ Ոստիկանները Քննչական կոմիտե են եկել իրենց փաստաբանների ուղեկցությամբ։
Լրագրողները փորձեցին խոսել Տիգրան Ուլուբաբյանի մատնացույց արած անձի հետ։ Նա ոստիկանության աշխատակցի ուղեկցությամբ, առանց լրագրողների հարցերին արձագանքելու, քայլում էր։ Խնդրեցին ներկայանալ՝ նշելով, որ իրեն են մատնանշում՝ որպես նույնականացված ոստիկան, ի պատասխան ուղեկցող ոստիկանն ասաց․ «Թողեք, էլի․․․ժողովուրդ ջան, բան չկա, գնում ենք այլ տեղ, ո՞ւր եք գալիս մեզ հետ։ Ի՞նչ գործ ունեք մեզ հետ»։
Լրագրողներն հարցրին՝ երբևէ տեսե՞լ եք Տիգրան Ուլուբաբյանին, նա ասաց՝ ոչ։ Հարցին՝ չեք եղե՞լ բաժնում, երբ բերման են ենթարկել նրան, կամ հրավիրել հարցաքննության, նա չպատասխանեց ու լուռ հեռացավ։
Կարդացեք նաև
Տաթև ՀԱՐՈՒԹՅՈՒՆՅԱՆ
