«Դուք ասացիք, որ քաղաքականություն մշակող մարմին եք, բայց ցանկացած նախարարություն իր քաղաքականությունը մշակում է՝ հիմնվելով կառավարության գործունեության, ծրագրի հիման վրա: Ուզում եմ ասեք՝ կառավարության ծրագրի ո՞ր դրույթն է նախատեսում, որ առողջապահության նախարարությունը աղմուկի կարգավորման իմաստով պետք է քաղաքականություն մշակի, խնդրում եմ ձեր հղումները կառավարության գործունեության 2021-2026թթ ծրագրին:
Եվ երբ դուք քաղաքականություն եք մշակում, այն պետք է հիմնված լինի Հանրային առողջության մասին օրենքի վրա, բնականաբար նախարարությունն իր քաղաքականության մեջ պետք է սահմանի, թե որոնք են առաջնահերթությունները»,- ԱԺ Մարդու իրավունքների պաշտպանության եւ հանրային հարցերի մշտական հանձնաժողովի նախաձեռնած՝ «Հանրային աղմուկը՝ որպես համակեցության կանոնների պահպանման խոչընդոտ, գործող իրավական կարգավորումներ: Օրենսդրական լուծումներ» թեմայով լսումների ժամանակ Առողջապահության նախարարին հարց ուղղեց Լեհաստանում Հայաստանի նախկին դեսպան, հանրային, քաղաքական գործիչ Էդգար Ղազարյանը:
«Ես ուզում եմ, որ դուք ասեք՝ հանրային առողջությանը սպառնացող հիվանդությունների ձեր դասակարգման մեջ աղմուկը որերորդ տեղում է…Այստեղ խոսվեց նաեւ ձայնի բացասական ազդեցության մասին, որը որոշ դեպքերում դառնում է խոշտանգման դրսեւորում, առանձնացրե՞լ եք պետական պաշտոնյաների, որոնց ձայնը հանրության վրա շատ բացասական ազդեցություն է թողնում: Օրինակ` ես լսել եմ, որ շատ մարդիկ դժգոհում են, որ վարչապետի ձայնը լսելիս երեխաները լացում են, շները՝ հաչում, նման բացասական ազդեցություն է լինում, դուք ուսումնասիրե՞լ եք ինչպես սահմանափակել այն մարդկանց, ում ձայնը տհաճ է հանրությանը»:
Առողջապահության նախարար Անահիտ Ավանեսյանը անպատշաճ համարեց Էդգար Ղազարյանի վերջին հարցը եւ չպատասխանեց դրան:
Կարդացեք նաև
Գոհար ՀԱԿՈԲՅԱՆ
