Պաշտպանության նախարար Սուրեն Պապիկյանն այսօր խորհրդարանում լրագրողների հետ ճեպազրույցում անդրադարձավ սահմանային իրավիճակին։
Արդեն մի քանի օր է՝ Ադրբեջանի ՊՆ-ն ապատեղեկատվություն է տարածում, թե իբր հայկական զինված ուժերը կրակ են բացում իրենց ուղղությամբ։
«Պետք են տեսագրություններ, քանի որ մեղադրողը մենք չենք, այլ մեր հարեւանը, դրա համար մենք ասում ենք՝ եթե ունեք ապացույցներ, տեսանյութեր, տրամադրեք մեզ, մենք պատրաստ ենք ուսումնասիրել, հետաքննել։ Մինչ օրս չենք ստացել նմանատիպ արձագանք»,- ասաց Պապիկյանը։ Հարցին, թե ինչո՞ւ ՀՀ ՊՆ-ն ապացույցներ չի ներկայացնում,որ հակառակորդը ստում է, Սուրեն Պապիկյանը պատասխանեց․ «Ինչի՞ մասին խոսենք, չեղած բանը ի՞նչը ապացուցենք։ Եթե կլինեն փաստեր, մենք պատրաստ ենք ուսումնասիրել, հետաքննել»։
Հարցին, թե ադրբեջանական կողմից զորքերի տեղաշարժ կա՞, Պապիկյանը պատասխանեց․ «Ոչ, չկա»։
Կարդացեք նաև
Ադրբեջանի կողմից զորքերի կուտակումներ կա՞ն հարցին, նա պատասխանեց․ «Որպեսզի նման գնահատական տամ, պետք են հետախուզական տվյալներ։ Այս պահին գետնի վրա նման երեւույթ տեսանելի չէ։ Մամուլում առկա ապատեղեկատվությունն այն մասին, որ տեղի են ունենում կուտակումներ, զորքերի տեղաշարժեր, ՊՆ-ն չի հաստատում»։
Լրագրողները նաեւ հետաքրքրվեցին՝ Սոթքի հատվածում կրակե՞լ են, Պապիկյանն ի պատասխան ասաց, որ բոլոր վտանգավոր կրակոցները, խախտումները, որոնք ուղղված են մեր դիրքերի վրա, ՊՆ-ի հաղորդագրություններում տեղ են գտնում։
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
Լուսանկարը՝ արխիվային
