«Քարոզարշավն անցնում է ամենօրյա ռեժիմով, բարձր մակարդակով, ժողովրդի մեծ աջակցությամբ եւ շատ արդյունավետ»,-Aravot.am-ին մարտի 30-ին Փարաքար համայնքի ՏԻՄ արտահերթ ընտրություններին ընդառաջ Նորակերտ համայնքի բնակիչների հետ հանդիպումից հետո ասաց «Միասնություն» դաշինքի թեկնածու Վալոդյա Գրիգորյանը:
Նա իր եւ իր քաղաքական ուժի հնարավորությունները գնահատում է բարձր: Հարցին, թե մրցակից ուժերը ինչ-որ ձեւով արձագանքո՞ւմ են իրենց քարոզարշավին, նա պատասխանեց. «Ես չեմ հետեւում մրցակիցներին: Մենք մեր քարոզարշավն ենք անցկացնում՝ անհատապես շփվելով ժողովրդի հետ, զրուցելով եւ գնահատում ենք մեր արդյունքները:
Հիշեցնելով հանդիպման ժամանակ արտահայտած միտքը, թե իր առավելությունը քիչ խոսելու մեջ է, հետաքրքրվեցինք, թե ի՞նչ նկատի ուներ, պատասխանը հետեւյալն էր. «Եթե հիշում եք, ասացի նաեւ, որ գաղտնիքն է այդտեղ: Կուզեմ, որ դա գաղտնիք մնա»:
Կարդացեք նաև
Ի՞նչ կասեք այն մասին, որ իշխող ուժի ներկայացուցիչներն ասում են, որ այս համայնքում իրենք շատ բան չեն կարողանում անել, որովհետեւ ընդդիմադիրներն են խանգարում. «Ես հասկացա, թե խոսքն ինչի մասին է: Ասողները սխալ են ասում: Դա ունի պատմություն: Ես կանդրադառնամ այդ պատմությանը: Բայց անդրադառնամ, թե չանդրադառնամ, բոլորին էլ պարզ է այդ պատմությունը, երբ որ մենք առաջարկեցինք համատեղ կառավարել համայնքը, կանգնած միկրոֆոնների առջեւ ասում էին՝ 11-ը 10-ից շատ է: Այդ ժամանակ մեր կարիքը չկար: Իսկ երբ խնդիրներ ունեցան եւ համայնքի կառավարումը տապալեցին, այդ ժամանակ հիշեցին, որ կա Վալոդյա Գրիգորյան եւ կան մարդիկ, որոնք ավագանու անդամներ են: Այդ ժամանակ արդեն խնդրում էին, չեմ վախենում այդ բառից, որովհետեւ դա այդպես է, որ եկեք այս անենք, այն անենք: Հիմա էլ ասում են՝ մենք տապալել ենք: Մենք չենք տապալել: Ժողովուրդը շատ լավ գիտի ամեն ինչ: Ես տարիների ընթացքում հասցրել եմ շփվել յուրաքանչյուրի հետ: Ժողովուրդն իր գնահատականը մարտի 30-ին իր քվեով կտա: Նախորդ ընտրություններից հետո տեղի ունեցածը էլ չի լինի, որովհետեւ մեր կոալիցիան լինելու է ժողովրդի հետ, ինչը բերելու է հաղթանակ»,-ասաց Վալոդյա Գրիգորյանը:
Աշոտ ՀԱԿՈԲՅԱՆ
