Հայաստանում իշխող «Քաղաքացիական պայմանագիր» կուսակցության խմբակցության պատգամավոր Արսեն Թորոսյանի կարծիքով, վերջին օրերին Բաքվի կողմից տարածվող հայ-ադրբեջանական սահմաններում իբր լարվածության մասին տեղեկությունները տեղեկատվական սադրանք է, որը մի քանի նպատակ է հետապնդում։
Խորհրդարանում լրագրողների հետ զրույցում նա ասաց․ «Առաջին անգամը չէ, որ մենք Ադրբեջանի կողմից արձանագրում ենք նման դեստրուկտիվ գործելաոճ, երբ որ որեւէ բան տեղի չունենալու պայմաններում նման հայտարարություններ ենք լսում։ Այս ամենով նպատակ ունեն խաթարելու մեր երկրի ներսում կայունությունը։ Նման դեպքեր էլի ենք ունեցել, որ բոլորս ահ ու սարսափի մեջ ապրենք»։
Արսեն Թորոսյանը հատկանշական է համարում այն, որ չնայած ՀՀ-ի կողմից առաջարկին, Բաքում որեւէ փաստարկ չի ներկայացնում իբրեւ ապացույց, որ կրակոց է եղել։ ՀՀ պաշտպանական գերատեսչության եւ ԵՄ քաղաքացիական առաքելության հայտարարությունները փարատում են բոլոր մտահոգությունները։
«Ադրբեջանի համար մի քիչ անսպասելի էր «Խաղաղության պայմանագրի» արագ համաձայնեցումը։ Նրանք նաեւ խնդիր են տենում իրենց անսպասելիությունից դուրս գալու, ինչու ոչ, նաեւ իրենց քաղաքական գինը թանկացնելու տարբեր դերակատարների մոտ։ Կարեւոր է, որ սա տեսնելով եւ այս գործելաոճը տեսնելով՝ ոչ առաջին անգամ, մեր անելիքներում ոչ մի բան չփոխենք։ Կարեւորը՝ մեր արձագանքն է նման պրովոկացիաներին։ Մեր պաշտպանական գերատեսչությունը պետք է ուշի ուշով հետեւի մեր սահմանային իրավիճակին, անկախ նրանից՝ կլինեն նման հայտարարություններ, թե չեն լինի, եւ ցանկացած դեպքում պատրաստ լինի արձագանքելու։ Մենք հայտարարել ենք, որ երբեք որևէ ռազմական գործողություն չենք սկսելու մեր հարեւանների հետ, որովհետեւ մենք ճանաչել ենք նրանց տարածքային ամբողջականությունը։ Դա աներկբա փաստ է միջազգային հանրության համար եւ դրա համար է, որ միջազգային հանրությունից հնչող հայտարարությունները համահունչ են մեր տեսակետին»։
Կարդացեք նաև
Նելլի ԳՐԻԳՈՐՅԱՆ
