«Պետական եկամուտների կոմիտեն լրագրողներին չի տարել: Լրագրողների այցի վերաբերյալ մեզ տեղեկացրել են: Ես տեղյակ չեմ, հայ լրագրողներին դիմե՞լ են, թե՞ ոչ: Դա առանձին հարց է, որ պիտի կառավարությունում քննարկվի եւ արձագանքենք: Ես նման հարցում չեմ ստացել։ Սահմանային անցակետում մեր գործառույթները սահմանափակվում են մաքսային ծառայության ֆունկցիաներով»,- այսօր խորհրդարանում լրագրողների հետ զրույցում ասաց ՊԵԿ նախագահ էդուարդ Հակոբյանը։
Լրագրողները հետաքրքրվել էին վերջերս Հայաստան այցելած թուրք լրագրողների՝ հայ-թուրքական սահմանին գտնվող Մարգարայի անցակետ տանելու մասին, մինչդեռ հայ լրագրողներին չի թույլատրվում այնտեղ գնալ։
Այս թեմայի վերաբերյալ ՊԵԿ նախագահի եւ լրագրողների երկար հարցուպատասխանը՝ տեսանյութում
Կարդացեք նաև
Պատասխանելով Մարգարայի անցակետի գործարկման հնարավորությունների մասին հարցին էլ՝ ՊԵԿ նախագահն ասաց. «Մարգարայի անցակետը պատրաստ է ամբողջությամբ իր մաքսային գործառույթը իրականացնելու, ամբողջ ենթակառուցվածքը պատրաստ է, մենք էլ որպես պետական եկամուտների կոմիտե, պատրաստենք այդ գործառույթները պատշաճ իրականացնելու։ Իսկ եթե հարցնում եք պետական սահմանի հնարավոր բացման մասին, դա ՊԵԿ-ի գործառույթը չէ»:
Նելլի ԳՐԻԳՈՐՅԱՆ
Լուսանկարում՝ ՀՀ վարչապետի աշխատակազմի Հանրային կապերի և տեղեկատվության կենտրոնի նախաձեռնությամբ, «Օրբելի» վերլուծական կենտրոնի համակարգմամբ՝ մարտի 10-12-ը Հայաստան այցելած թուրքական 10 լրատվամիջոցներն այցելել են Հայաստան-Թուրքիա պետական սահմանի «Մարգարա» անցակետ, որտեղ ծանոթացել են գործարկման ենթակա անցակետի հնարավորություններին։
