Այս իշխանությունը ստով եկել, ստով էլ շարունակում է, իրեն վստահելու պատճառ չունեմ: Ունեցել եմ հայրենիք, շատ մեծ է եղել, հիմա փոքրացել է: Չեմ վստահելու երբեք ու պայքարելու եմ մինչեւ վերջ, որ գնան: Այսօր Ազատության հրապարակում «Սրբազան պայքարի» աջակիցների կազմակերպած «Չեմ վստահում Նիկոլ Փաշինյանի իշխանությանը» բողոքի ցույցի ժամանակ լրագրողներին ասաց ակցիայի մասնակիցներից Մանուկ Մանուչարյանը:
Բողոքի ակցիան խորհրդանշական հանրաքվեի ձեւով էր, Նիկոլ Փաշինյանի իշխանությանը չվստահողները համապատասխան քվեաթերթիկն են լրացնում ու գցում քվեատուփ:
«Իրենց վարած քաղաքականությունն այսօր հայ երիտասարդությանն ու ապագա սերունդին կանգնեցրել է փաստի առաջ: Վտանգված ենք այն առումով, որ ադրբեջանցիները շուտով գալու են ու նապաստակի պես բազմանալու են: 300.000 ադրբեջանցին 30 տարվա ընթացքում 4 միլիոն է լինելու, չզարմանաք, որ նրանցից մեկն էլ ապագայում մեր երկիրը ղեկավարի: Փաստի առաջ ենք ու անտարբերության իրավունք չունենք»,- ասաց Մանուկ Մանուչարյանը:
Կարդացեք նաև
Նա նկատեց, որ խաղաղությունը չի լինում պայմանագրով, աշխարհի պատմությունը ցույց է տալիս, որ նման փաստաթղթերի կնքումից կարճ ժամանակ անց խաղաղության պայմանագիր ստորագրած երկու կողմերը պատերազմում են. «Չեմ կարծում, որ փաստաթուղթը խաղաղության երաշխիք է: Երաշխիքը ուժն է» :
Արփինե ՍԻՄՈՆՅԱՆ
