Մարտի 18-ին Կարեն Դեմիրճյանի անվան Երևանի մետրոպոլիտենի գլխավոր տնօրենի ժ/պ Բաբկեն Սեդրակյանն ընդունել է Ասիական զարգացման բանկի (ԱԶԲ) գլխամասային գրասենյակի ներկայացուցիչներ Ռուդիգեր Զանդերին, Նիկոլաս Կաստելլին և ԱԶԲ հայաստանյան գրասենյակի ներկայացուցիչ Վարդան Կարապետյանին:
Հանդիպմանը մասնակցում էին նաև Երևանի մետրոպոլիտենի շահագործման գծով տնօրեն Սամվել Եղիազարյանը և տեխնիկական բաժնի պետ Աղասի Ղուկասյանը։
Հանդիպման ընթացքում քննարկվեցին Երևանի մետրոպոլիտենի զարգացման և ընդլայնման ռազմավարական ծրագրերն, որոնք ուղղված են մետրոպոլիտենը դարձնել առավել անվտանգ, հարմարավետ և համապատասխան միջազգային չափանիշներին՝ ստեղծելով ժամանակակից և արդյունավետ ուղևորափոխադրումների համակարգ։
Մետրոպոլիտենի գլխավոր տնօրենի ժ/պ Բաբկեն Սեդրակյանը ներկայացրեց վերջին տարիներին մետրոպոլիտենում կատարված աշխատանքները։ Նա նշեց,որ չնայած պետության աջակցությամբ մեծ ծավալի աշխատանքներ են իրականացվել, սակայն մետրոյի զարգացման ու վերազինման համար անհրաժեշտ են խոշոր ներդրումներ։
Կարդացեք նաև
ԱԶԲ-ի ներկայացուցիչները այցելեցին մետրոպոլիտենի կարգավարական կենտրոն, էներգո համակարգի կարգավարական կենտրոն, շրջեցին ԴԵՊՈ-ի տարածքում՝ ծանոթանալով գործող ենթակառուցվածքներին և հասկանալու տեխնիկական հնարավորություններն ու պահանջվող աշխատանքների ծավալը:
Շնորհակալություն հայտնելով ընդունելության համար՝ հյուրերը հույս հայտնեցին, որ սկիզբ կդրվի նոր և շարունակական համագործակցության:
Հանդիպումն անցավ ջերմ և աշխատանքային մթնոլորտում:
Երևանի մետրոպոլիտեն
