ՀՀ ԱԺ «Քաղաքացիական պայմանագիր» խմբակցության պատգամավոր Ալեքսեյ Սանդիկովն ու «Հայաստան» խմբակցության պատգամավոր Քրիստինե Վարդանյանը մարտի 18-ին հեռավար ձեւաչափով հանդիպել են ՌԴ Դաշնային ժողովի Դաշնության խորհրդին կից Երիտասարդ օրենսդիրների պալատի ներկայացուցիչների հետ:
Ալեքսեյ Սանդիկովը հույս է հայտնել, որ այս հանդիպումը կնպաստի երկու երկրների երիտասարդ օրենսդիրների համագործակցության ակտիվացմանը: Պատգամավորը տեղեկացրել է, որ Հայաստանի խորհրդարանն իրականացնում է տարբեր՝ «Բաց դաս», «Ճանաչողական այց», «ԱԺ ամառային դպրոց» եւ այլ ծրագրեր: Նա նշել է, որ Հայաստանի տարբեր բուհերում սովորող ուսանողներ հնարավորություն ունեն իրենց ուսումնական փորձաշրջանն անցկացնել օրենսդիր մարմնում:
ՌԴ ԴԺ Դաշնության խորհրդի սոցիալական քաղաքականության հանձնաժողովի նախագահի առաջին տեղակալ, Երիտասարդ օրենսդիրների պալատի համակարգող Ալեքսանդր Վարֆոլոմեեւը կարեւորել է միջխորհրդարանական փոխգործակցությունը եւ հույս հայտնել, որ երիտասարդների մասնակցությունն ավելի կնպաստի այդ գործընթացին: Նա նշել է, որ ռուս երիտասարդ օրենսդիրներն ակտիվ համագործակցում են տարբեր երկրների երիտասարդ խորհրդարանականների հետ:
Երիտասարդ օրենսդիրների պալատի նախագահ Լեո Զակիրովը ներկայացրել է պալատի կառուցվածքը, իրականացրած ծրագրերը, իսկ փոխնախագահ Ալբերտ Գեւորգյանը խոսել է «Նույն ալիք» նախագծի մասին:
Կարդացեք նաև
Կողմերը պատրաստակամություն են հայտնել համագործակցելու նոր ծրագրերի իրականացման հարցում:
ԱԺ
