«Իրավիճակն ապակայունացման չի գնում։ Այո, Ադրբեջանից հնչում են անհասկանալի հայտարարություններ։ Ճիշտ նկատեցիք՝ բուն գործընթացի հետ կապ չունեցող»,- խորհրդարանում լրագրողների հետ ճեպազրույցում ասաց իշխող ուժը ներկայացնող «Քաղաքացիական պայմանագիր» խմբակցության քարտուղար Արթուր Հովհաննիսյանը՝ պատասխանելով հարցին, որ ի հեճուկս Հայաստանի եւ Ադրբեջանի միջեւ խաղաղության համաձայնագրի ավարտի մասին հայտարարությունների՝ ադրբեջանական կողմն արդեն մի քանի օր է՝ ինտենսիվ ապատեղեկատվություն է տարածում՝ հայ-ադրբեջանական սահմաններում միջադեպերի մասին՝ մեղադրելով հայկական կողմին։
ՀՀ-ում իշխող ուժի ներկայացուցիչը հայտարարեց, որ ադրբեջանական կողմից ՀՀ կառավարությունն ակնկալում է որոշակի փաստական տվյալներ՝ իր հայտարարությունների մասին, որպեսզի ինքներս ուսումնասիրենք հայկական կողմից խախտումները․ «Ադրբեջանի կողմից պաշտոնական հայտարարություն է հնչում այն մասին, որ հրադադարի խախտում է տեղի ունեցել հայկական կողմից, մենք էլ միջազգային հանրության համար, բոլորի համար հստակ ասում ենք՝ եթե կան փաստական տվյալներ, հրապարակեք։ Այս պահին արձագանք չկա»։
Արթուր Հովհաննիսյանը նաեւ հավելեց, որ ադրբեջանական կողմը երբեք նման տվյալներ չի տրամադրել, քանի որ նման տվյալներ չկան։
Նա չի կարծում, որ իրավիճակն այլ ուղղությամբ է գնում, պնդում է, որ խաղաղության համաձայնագրի տեքստը երկկողմ է համաձայնեցված, միջազգային հանրությունն էլ դրական է արձագանքել՝ կոչ անելով անցնել համաձայնագրի ստորագրման փուլին։
Կարդացեք նաև
Արթուր Հովհաննիսյանը ադրբեջանական կողմին կոչ է անում վերադառնալ կառուցողական դաշտ եւ անցնել համաձայնագրի ստորագրման տեխնիկական գործընթացին։
Հովհաննիսյանի խոսքով՝ եթե Ադրբեջանը վերջնականապես պատրաստ լիներ խաղաղության, հիմա կսկսեին քննարկումները խաղաղության պայմանագրի ստորագրման վերաբերյալ․ «Հույս ենք հայտնում, որ Ադրբեջանը կվերադառնա կառուցողական դաշտ»։
Մանրամասները՝ տեսանյութում
Նելլի ԳՐԻԳՈՐՅԱՆ
