Գյումրու արտահերթ ՏԻՄ ընտրություններին մասնակցող «Կոմունիստական կուսակցության» ցուցակը գլխավորող նախկին քաղաքապետ Վարդան Ղուկասյանը Կենտրոնական ընտրական հանձնաժողովին ներկայացրած գույքի ու եկամուտների հայտարարագրում նշել է, որ ունի 4 անշարժ գույք, որից մեկը Սլաբոդկա թաղամասի իր տունն է՝ 588 քառակուսի մետր բնակելի մակերեսով։
Մյուսը` Վարդ Բաղ թաղամասում է, նկուղի հետ միասին 42․8 քառակուսի մետր է։ Այդ նույն թաղամասում նա նաև հողամաս ունի, սակայն թե՛ բնակարանի և թե՛ հողամասի դեպքում համասեփականատեր է։
Իսկ Սլաբոդկայի տան դեպքում սեփականատեր է։ Նա միանձնյա սեփականատեր է նաև Շահումյան փողոցում՝ կենտրոնական շուկայի հարակից տարածքում գտնվող 0,021 քառակուսի մետր առևտրի համալիրի։
Նախկին քաղաքապետը որպես շարժական գույք՝ հայտարարագրել է 2005 թվականի «BMW 760 Li» մակնիշի թեթև մարդատար ավտոմեքենա։
Կարդացեք նաև
Ամենաճոխը «Թեկնածուի թանկարժեք գույք» աղյուսակում լրացրածն է։
Գյումրու նախկին քաղաքապետը հայտարարագրել է ոսկյա ժամացույց, ապարանջան, ոսկյա խաչ ապարանջանով, ադամանդյա երկու մատանիներ, որոնց ընդհանուր արժեքը կազմում է 6 միլիոն 650 հազար դրամ։
Որպես եկամուտ՝ նշված է միայն կենսաթոշակը, որը կազմում է 530 հազար դրամ։ Հայտարարագիրը ներկայացնելու օրվա դրությամբ Գյումրու նախկին քաղաքապետն ունեցել է 4 միլիոն ՀՀ դրամ, 6000 եվրո, 3500 ԱՄՆ դոլար։
Նա նաև նշել է, որ «Ալեքպոլ» ՍՊԸ-ի՝ «Ալեքսանդրապոլ հյուրանոցի» 50 տոկոս բաժնեմասի տերն է։ Նշենք, որ այն Հայաստանի շքեղ հյուրանոցներից մեկն է։
Նունե ԱՐԵՎՇԱՏՅԱՆ
