Երկուշաբթի, 17 Մարտ 2025-ին, Ն.Ս.Օ.Տ.Տ. Արամ Ա. Վեհափառ Հայրապետը ընդունեց այցելութիւնը Հայ Յեղափոխական Դաշնակցութեան (Հ.Յ.Դ.) նորընտիր Բիւրոյի անդամ Յակոբ Բագրատունիի, որ Հայաստանէն վերադարձին Մայրավանք այցելած էր ստանալու համար Նորին Սրբութեան օրհնութիւնը:
Բագրատունի Նորին Սրբութեան յայտնեց, թէ Բիւրոյի նորընտիր կազմին մէջ իրեն յանձնուած է Միջին Արեւելքի պատասխանատուութիւնը: Ան Բիւրոյին անունով յատուկ շնորհակալութիւն յայտնեց Վեհափառ Հայրապետին, որ Հ.Յ.Դ.ի 35-րդ ընդհանուր ժողովին իր հայրապետական օրհնութեան խօսքը ուղղած էր բացման նիստին։
Վեհափառ Հայրապետը շնորհաւորեց անոր ընտրութիւնը եւ իր բարձր գնահատանքը յայտնեց ի տես Լիբանանի հայութեան կեանքին մէջ երկար տարիներու անոր ծառայութեան, յատկապէս կրթական, համայնքային, քաղաքական ու կուսակցական բնագաւառներուն մէջ: Նորին Սրբութիւնը յոյս յայտնեց, որ վերանորոգ նուիրումով ան պիտի շարունակէ իր ազգային ծառայութիւնը՝ աւելի լայն ծիրէն ներս, մանաւանդ ներկայ ժամանակներուն, երբ շրջանէն ներս մեր համայնքները կը դիմագրաւեն լուրջ մարտահրաւէրներ:
