ՀՀ կրթության, գիտության, մշակույթի և սպորտի նախարարի տեղակալ Արաքսիա Սվաջյանը մասնակցել է մաթեմատիկայի ուսուցիչների համաժողովին, որը կազմակերպել էր «Քառակուսի» կրթական հիմնադրամը:
Երկօրյա համաժողովի ընթացքում անդրադարձ է կատարվել մաթեմատիկայի դասագրքերի հայեցակարգին, կարողունակությունների զարգացման ինտերակտիվ մեթոդներին, արհեստական բանականության միջոցով ուսուցմանը, մաթեմատիկական և գիտատեխնիկական կարողունակությունների ձևավորմանը և այլ թեմաների:
Ողջունելով համաժողովի մասնակիցներին՝ ԿԳՄՍ նախարարի տեղակալ Արաքսիա Սվաջյանը լայնածավալ բարեփոխումների համատեքստում կարևորել է ուսուցչական համաժողովների անցկացումը կրթական տարբեր մակարդակներում:
«Վստահ եմ՝ համաժողովը փորձի փոխանակման, մասնագիտական հարցերի շուրջ քննարկումներ ծավալելու լավ հնարավորություն է: Ուսուցչի կարևոր առաքելությունը դասավանդումն է, բայց լավ դասավանդելու համար կարևոր են նաև մասնագիտական համայնքի հետ քննարկումները»,- ասել է Արաքսիա Սվաջյանը:
Կարդացեք նաև
ԿԳՄՍ նախարարի տեղակալն ընդգծել է՝ հանրակրթության պետական չափորոշչի ներդրման շրջանակում բնագիտամաթեմատիկական առարկաներն առանցքային տեղ են զբաղեցնում: Մասնավորապես՝ մեծ ուշադրություն է դարձվում դասավանդման որակի բարձրացմանը:
«Վերլուծական մտածողության, տրամաբանության և մի շարք այլ կարողությունների զարգացման համար մաթեմատիկան հիմնարար առարկա է: Դրա դասավանդման արդյունավետության հետ կապված կան խնդիրներ, որոնց քննարկումը մասնագիտական հանրույթի կողմից ունի կարևոր նշանակություն՝ լուծումներ գտնելու տեսանկյունից»,- ասել է Արաքսիա Սվաջյանն ու ընդգծել տարբեր ստուգատեսների միջոցով մաթեմատիկայի արդյունքների ներքին և արտաքին գնահատումները:
Նրա տեղեկացմամբ՝ 2024 թվականին TIMSS-ի միջազգային գնահատման արդյունքներով Հայաստանի չորրորդ դասարանցիների մաթեմատիկայի իմացությունը բարելավվել է, որն արտահայտվել է 15 միավորի աճով: 2019 թվականին նույն ստուգատեսի ժամանակ գրանցված 498 միավորի համեմատ 2024 թվականին չորրորդ դասարանցիներն ապահովել են 513 միավոր՝ առաջին անգամ հայտնվելով միջինից բարձր արդյունքներ ցուցաբերած երկրների խմբում /միջինից բարձր է համարվում 500 միավորից ավելին/:
«Այս դրական ցուցանիշը, միանշանակ, ձեր բոլորի աշխատանքի արդյունքն է: Բայց մենք այժմ դիտարկում ենք հաջորդ տարվանից TIMSS հետազոտություններում նաև 8-րդ դասարանի մասնակցության հարցը։ Իհարկե, մաթեմատիկան բարդ առարկա է, բայց պետք է փորձել այնպես կազմակերպել դասավանդումը, որ գործընթացին ներգրավվեն բոլոր աշակերտները: Այս տարի առաջին անգամ 9-10-րդ դասարանների աշակերտները մասնակցելու են PISA միջազգային հետազոտությանը, որը ցույց կտա արդեն կրթության մակարդակը բարձր դասարաններում»,- ասել է ԿԳՄՍ նախարարի տեղակալը:
Արաքսիա Սվաջյանի խոսքով՝ այժմ շրջանառվող «Բարձրագույն կրթության և գիտության մասին» նոր օրենքի նախագծով մաթեմատիկայից գիտելիքի ստուգումը դառնալու է բուհական ընդունելության պարտադիր մուտքային պահանջ. բոլոր դիմորդները մաթեմատիկայից քննություն են հանձնելու: «Սա, իհարկե, մեծ ջանք ու ռեսուրս է պահանջում, բայց անիրատեսական չէ: Այժմ մենք փոքր ծավալի փորձնական ծրագրեր ենք իրականացնում, որոնք ցույց են տալիս՝ ջանք ներդնելու, նպատակներ սահմանելու և ճիշտ մեթոդներ ընտրելու պարագայում հնարավոր է հասնել հաջողությունների: Դրա վառ ապացույցը 15 ավագ դպրոցում արհեստական բանականության պիլոտային ծրագրի իրականացումն է, որի շրջանակում 10-րդ դասարանից սկսած՝ աշակերտները խորացված մաթեմատիկա են ուսումնասիրում, ինչպես նաև սովորում են ծրագրավորման լեզուներ: Հայաստանը տեղեկատվական տեխնոլոգիաների ոլորտում դիրքավորվելու նպատակ ունի, ցանկանում ենք մրցունակ լինել աշխարհում, և այս առումով մաթեմատիկայի իմացությունը պարտադիր բաղադրիչ է»,- նշել է Արաքսիա Սվաջյանը՝ կարևորելով նաև ուսուցիչների աշխատանքը:
ԿԳՄՍ նախարարի անդրադարձել է նաև հանրակրթության նոր չափորոշչի ներդրման շրջանակում «Քառակուսի» հիմնադրամի կողմից ստեղծված մաթեմատիկայի դասագրքերին, որոնք արդեն կիրառվում են դպրոցներում: Ըստ Արաքսիա Սվաջյանի՝ ստացվել են մի շարք դրական արձագանքներ, ինչպես նաև բարձրացվել են որոշակի խնդիրներ, որոնք քննարկվել են հեղինակների հետ:
«Մաթեմատիկան, թերևս, ամենահետաքրքիր, բայց նաև բարդ առարկաներից է. եթե երեխան որևէ բան չի հասկանում, նրա մոտ կարող են առաջանալ վախեր, նա կարող է ձանձրանալ և այդպիսով կորցնել հետաքրքրությունը: Պետք է փորձենք այնպես անել, որ այս առարկան իրապես դառնա գրավիչ և ուրախ, որպեսզի երեխաներն առավել մեծ հետաքրքությամբ այն ուսումնասիրեն: Ընդ որում՝ աղջիկներին ևս պետք է խրախուսենք՝ բնագիտամաթեմատիկական առարկաներից հաջողությունների հասնելու առումով, քանի որ մեծ ներուժ ունեն»,- նշել է Արաքսիա Սվաջյանը:
Համաժողովի ընթացքում «Քառակուսի» հիմնադրամի տնօրեն Սմբատ Գոգյանը ներկայացրել է մաթեմատիկայի 5-9-րդ դասարանների դասագրքերի հայեցակարգն ու մեթոդաբանությունը։ Կայացել է պանելային քննարկում՝ «Ուսուցանում արհեստական բանականության միջոցով» թեմայով։
ՀՀ ԿԳՄՍՆ ՀԱՍԱՐԱԿԱՅՆՈՒԹՅԱՆ ՀԵՏ ԿԱՊԵՐԻ ԵՎ ՏԵՂԵԿԱՏՎՈՒԹՅԱՆ ՎԱՐՉՈՒԹՅՈՒՆ
