«Տենց չի արվում, դա արվում է դիվանագիտական ճանապարհներով»,-հարցին՝ հնարավո՞ր է, որ ՀՀ-ն՝ որպես խաղաղության պայմանագրի ստորագրման նախապայման Ադրբեջանին ներկայացնի մեր գերիների վերադարձի հարցը, լրագրողների հետ ճեպազրույցում այսպես պատասխանեց ՀՀ ԱԺ նախագահ Ալեն Սիմոնյանը։
Նա նկատեց՝ նման մի միտք Վարդան Օսկանյանն էր ասել ու պնդեց․ «Նման բան ասելը նշանակում է բանակցությունները և այն, ինչ կատարվում է, մտցնել փակուղի և իրավիճակը սրել։ Դա չի արվում նախապայմանների տրամաբանությամբ, դա արվում է դիվանագիտական ճանապարհներով, ինչն արվել է վերջին չորս տարվա ընթացքում, և 150 գերուց ունենք 23 հաստատված գերի, որոնց մի մասը արդեն 2023-ի ժամանակ են գերեվարվել և պատանդ վերցվել»։
Ալեն Սիմոնյանն անընդունելի համարեց գերիների հարցով վերջնագրերով խոսելը․ «Ուլտիմատումներ ներկայացնել որևէ կողմին՝ իրենք մեզ, մենք՝ իրենց, դա նշանակում է ուղղակի վերահաստատել այն, ինչ անում են այսօր մեր պետության դեմ աշխատող որոշ կողմեր և մարդիկ»։
Այն հիշեցմանը՝ ընդդիմությունն ասում է, որ այս փաստաթղթում փոխզիջման մասին խոսք չկա, ավելին՝ երկկողմ կապիտուլյացիա է, Ալեն Սիմոնյանը պատասխանեց․ «Երկկողմանի փաստաթուղթը ո՞նց կարող է կապիտուլյացիա լինել։ Եթե երկուսիս համար հավասար բան ենք պայմանավորվել, դրա կապիտուլյացիան ո՞րն է»։
Կարդացեք նաև
Հարցին՝ Ադրբեջանը ՀՀ-ի դեմ միջազգային դատարան ներկայացված հայցերը հետ կանչելո՞ւ է, Ալեն Սիմոնյանը վստահեցրեց․ «Բա ինչ պիտի անեն»։
Տաթև ՀԱՐՈՒԹՅՈՒՆՅԱՆ
