Ռուբեն Վարդանյանի ընտանիքի փաստաբան Ջարեդ Գենսերը կոչ է արել Հայաստանի վարչապետ Նիկոլ Փաշինյանին և արտգործնախարար Արարատ Միրզոյանին ուշադրություն դարձնել ԱՄՆ նախագահ Դոնալդ Թրամփի Ազգային անվտանգության խորհրդական Մայքլ Ուոլցի հայտարարությանը, հատկապես ընդգծելով, որ այն վերաբերում է ոչ միայն խաղաղության պայմանագրի ավարտին, այլ նաև հայ քրիստոնյա գերիների ազատ արձակմանը՝ վստահություն հայտնելով, որ այս առումով նա լիովին համաձայն է Թրամփի վարչակազմի հետ:
Հիշեցնենք, որ Ուոլցը հայտարարել է, որ Հարավային Կովկասում հակամարտությունը պետք է ավարտվի: Նա նշել է, որ շաբաթվա ընթացքում հանդիպել է Ադրբեջանի նախագահ Իլհամ Ալիևի ազգային անվտանգության հարցերով խորհրդական Հիքմեթ Հաջիևի հետ:
Ուոլցը ողջունել է Հայաստանի և Ադրբեջանի միջև խաղաղության պայմանագրի վերաբերյալ համաձայնությունը՝ նշելով, որ դա մեծ առաջընթաց է: Նա Հաջիևին հայտնել է, որ խաղաղության պայմանագիրը պետք է ավարտվի, գերիները ազատ արձակվեն, և կողմերը պետք է միասին աշխատեն՝ տարածաշրջանը ավելի անվտանգ և բարգավաճ դարձնելու համար:
