Կոտայքի մարզի Ողջաբերդ գյուղի բնակիչները ի նշան բողոքի՝ առավոտյան 10 րոպեով փակել էին գյուղի ճանապարհը: Նրանք պահանջում են վերադարձնել գյուղի նախկին ղեկավար Աշոտ Մուշեղյանին։
Ողջաբերդցիները պնդում են, որ Աշոտ Մուշեղյանին ապօրինի կերպով են ազատել աշխատանքից, նրանք նաեւ դեմ են, որ գյուղը ղեկավարի Գրիգոր Մելքոնյանը, որի հայրը ժամանակին եղել է իրենց գյուղապետը։ «Ողջաբերդը սահող գյուղ է, իսկ Գրիգոր Մելքոնյանի հայրը՝ Նորայր Մելքոնյանը ժամանակին ոչինչ չի արել այս գյուղի համար՝ լինելով գյուղապետ, մինչդեռ Աշոտ Մուշեղյանը բավականին բան է փոխել համայնքում, կանգառները վերանորոգել է, լուսավորությունը տեղին է, տուրիզմը զարգանում է, գյուղը կանաչապատ է: Գյուղացու հետ աղբը հավասար հավաքել է: Ի դեպ, Աշոտ Մուշեղյանին ազատելուց հետո գյուղը 8 ամիս համայնքի ղեկավարի ժամանակավոր պաշտոնակատար չի ունեցել: Եթե ժողովրդավար երկիր ենք, մեր ձայնը լսելի է, մեր քվեն հաշվելի է, ինչու մեզ չեն հարցնում՝ ում ենք ուզում տեսնել գյուղապետի պաշտոնում»,- Aravot.am-ի հետ զրույցում նշեց Անժելիկա Մարգարյանը:
Կարդացեք նաև
Ողջաբերդի բնակիչները դիմել են Կոտայքի մարզպետին, նաեւ նամակ են ուղղել Նիկոլ Փաշինյանին: Նրանք մարզպետարանից պահանջում են ներկայացնել հիմնավորումները, որոնցով համայնքի ղեկավարին ազատել են աշխատանքից, քանի որ վստահ են, որ անձնական խնդիրների պատճառով է մարզպետը նրան աշխատանքից ազատել: Ողջաբերդցիները, որ կարճատեւ էին փակել ճանապարհը, նաեւ զարմացած են, որ փոքր գյուղն այդ ընթացքում լցրել են մեծաթիվ ոստիկաններով:
Մասնագիտությամբ իրավաբան Ամիդա Դավթյանը, որ երկար տարիներ ապրել է Ողջաբերդում, եւս ներկա էր ցույցին: Նա ասում է, որ եթե չկար ազատման հրաման, բայց մարդուն ազատում են աշխատանքից, դա արդեն հանցակազմ է պարունակում: Մեկ այլ ողջաբերդցի՝ Ժորա Փոթոյանն ասում էր, որ ցույցի մասնակիցների մեջ նախկին գյուղապետը որեւէ բարեկամ չունի, իրենք գյուղացիներ են, որոնք ուղղակի պահանջում են իրենց գյուղապետին:
Գոհար ՀԱԿՈԲՅԱՆ
