Ծանրամարտի Հայաստանի կանանց ազգային հավաքականը գլխավոր մարզիչ Արտաշես Ներսիսյանի ղեկավարությամբ ուսումնամարզական հավաք է անցկացնում Գյումրիում: Մեր ընտրանին նախապատրաստվում է ապրիլի 13-ից 21-ը Մոլդովայում անցկացվելիք Եվրոպայի առաջնությանը:
Արտաշես Ներսիսյանը Aravot.am-ին ասաց, որ թիմը մրցավայր մեկնելու է ամբողջական կազմով՝ 10 մարզուհի: «Մարզումներն ընթանում են բնականոն հունով, աղջիկներն աստիճանաբար մոտենում են պահանջվող մարզավիճակի: Մոլդովայում ուժեղ եւ արժանի մրցակիցներ ենք ունենալու: Ես ձեռնպահ եմ մնում կանխատեսումներ անելուց, քանի որ սա սպորտ է, իսկ սպորտը միշտ էլ անկանխատեսելի է: Եթե ամեն ինչ նորմալ հունով ընթանա, աղջիկները Եվրոպայի առաջնությանը արժանապատիվ մասնակցություն կունենան»,-ասաց մասնագետը:
Գլխավոր մարզիչը նշեց, որ Եվրոպայի առաջնություն մեկնող մարզուհիների անունները արդեն հայտնի են եւ մեզ փոխանցեց ցուցակը: Մոլդովայում հանդես կգան. 55 կգ՝ Ալեքսանդրա Գրիգորյան եւ Իզաբելլա Յայլյան, 76 կգ՝ Աննա Ամրոյան եւ Միլենա Խաչատրյան, 81 կգ՝ Էմմա Պողոսյան եւ Մարգարիտա Առաքելյան, 87 կգ՝ Լիաննա Գյուրջյան եւ Տաթեւ Հակոբյան, +87 կգ՝ Ջուլիետա Ավանեսյան եւ Մերի Թումասյան:
Կարդացեք նաև
Աշոտ ՀԱԿՈԲՅԱՆ
