Aravot.am-ի տեղեկություններով, ԱԱԾ-ից օպերատիվ տեղեկություն է ստացվել, որ Վայոց Ձորի Գողթանիկ բնակավայրի նախկին ղեկավար Համբարձում Սամվելյանը պաշտոնավարման տարիներին թույլ է տվել չարաշահումներ, յուրացրել է համայնքին նվիրաբերված գյուղտեխնիկան: Մասնավորապես , ՀՀ Կենտրոնական բանկի եւ Գողթանիկ համայնքի միջեւ 2013թ. դեկտեմբերի 25-ին կնքված պայմանագրի համաձայն՝ Կենտրոնական բանկը Գողթանիկ գյուղական համայնքին անհատույց ժամանակավոր օգտագործման է հանձնել «ՄՏԶ» ինքնագնաց հողափոր մեքենա՝ էքսկավատոր: Նույն պայմանագրի շրջանակներում նվիրառուն՝ ի դեմս համայնքապետ Սամվելյանի, պարտավորվել էր գյուղտեխնիկան պահպանել սարքին վիճակում:
Ըստ ոստիկանության մեր աղբյուրի, ձեռնարկված օպերատիվ հետախուզական միջոցառումների շրջանակներում ստացվել են տեղեկություններ, որ Սամվելյանը Կենտրոնական բանկի կողմից կնքված պայմանագրի շրջանակներում անհատույց Գողթանիկ բնակավայրին օգտագործման տրամադրված նշված տեխնիկան չի գրանցել համայնքապետարանի հաշվեկշռում, հափշտակել է իրեն վստահված գույքը:
