Ռոբերտ Քոչարյանի եւ մյուսների մեղադրանքի վերաորակման վերաբերյալ դատախազության միջնորդությունը պետք է թողնվի առանց քննության կամ մերժվի։ Այսօր Հակակոռուպցիոն դատարանում ՀՀ 2-րդ նախագահ Ռոբերտ Քոչարյանի եւ մյուսների գործով դատական նիստում նման դիրքորոշում հայտնեց Քոչարյանի պաշտպաններից Արամ Օրբելյանը:
Արամ Օրբելյանի խոսքով, զանգվածային անկարգությունների վերաբերյալ քրեական գործը միացվել է հակասահմանադրական ճանաչված հոդվածով գործին, որով մեղադրանք է ներկայացվել Քոչարյանին և մյուսներին: Փաստաբանն ընդգծեց, որ մեղադրող կողմը չէր արծարծել մեղադրանքի վերաորակման հարցը։
Փաստաբանի խոսքով՝ դատախազության միջնորդությունն այս փուլում ընդհանրապես չի կարող քննարկվել՝ հաշվի առնելով, որ գործը քննվում է նոր քրեական դատավարության օրենսգրքի կարգավորումներով, մինչդեռ վերաորակման հնարավորության բացակայության կարգավորումը հակասահմանադրական էր ճանաչվել նախորդ դատավարության օրենսգրքով. «Այս գործն առհասարակ չէր կարող քննվել՝ իրավաբանորեն, չկա մեղադրանք»։
Այսօր դատական նիստը հետաձգվեց, Արամ Օրբելյանը կշարունակի ներկայացնել դատախազության միջնորդության վերաբերյալ իր դիրքորոշումը հաջորդ դատական նիստին։
Կարդացեք նաև
Արփինե ՍԻՄՈՆՅԱՆ
