«Մենք այսօր առնվազն 23 գերիներ, պատանդներ, այլ պահվող անձինք ունենք Ադրբեջանում եւ նաեւ մենք փորձում ենք հնարավոր ջանքերը գործադրել այդ խնդրի լուծման համար: Բայց մյուս կողմից պետք է հասկանանք, որ դա տեղի է ունենում մի պայմաններում, երբ Ադրբեջանը, ըստ էության, այդ գործոնը նույնպես օգտագործում է էսկալացիոն տրամաբանությամբ եւ էսկալացիոն նպատակներով»,-նշեց Նիկոլ Փաշինյանը պատասխանելով թուրքական լրատվամիջոցների հարցերին։
Ըստ վարչապետի՝ ասում են Հայաստանի կառավարությունն անհրաժեշտ ջանքեր չի գործադրում այդ խնդիրը լուծելու համար։ «Ես, ընդհանուր առմամբ, այդ քննադատությունը հասկանում եմ եւ միշտ ասում եմ՝ քանի դեռ այդ ջանքերը, որ կառավարությունը գործադրում է, արդյունք չեն տալիս, բոլորը կարող են ասել՝ որ ջանք չի գործադրվում, որովհետեւ այդ ջանքերը հիմնականում դիվանագիտական մակարդակով են գործադրվում: Ինչո՞ւ, որովհետեւ այս ժանրի մեջ հրապարակային հայտարարությունները պետք է լինեն շատ նպատակային եւ կոնկրետ նպատակի ծառայեն: Եվ այդ հրապարակային հայտարարությունների որոշակի դեպքերից անդին՝ արդեն իրենք ոչ մի օգուտ չեն տալիս եւ ընդհակառակը՝ վնաս են տալիս»,-նշեց Փաշինյանը։
Նա հիշեցրեց 2023 թվականի դեկտեմբերը, երբ 32 գերեվարված հայերը վերադարձան Հայաստան, եւ մինչեւ վերջին վայրկյանը ոչ մեկի հայտնի չէին այն ջանքերը, որ կառավարությունը գործադրում էր։
«Մինչեւ վերջին վայրկյանը հնչում էին քննադատություններ, որ կառավարությունը ոչինչ չի անում: Եվ այդ մարդիկ իրենց տեսակետից ճիշտ էին, որովհետեւ նրանց տեսակետից կառավարությունը որեւէ բան անում է միայն այն պարագայում, երբ այդ խնդիրը լուծված է»,-նշեց նա։
Կարդացեք նաև
Փաշինյանի գնահատմամբ այդ հարցը ցավոտ հարց է։ «Ընդ որում արդեն իսկ հրապարակային հայտարարություններ կան խոշտանգումների մասին, արդեն իսկ վիզուալ հիմնավորումներ արգելված միջոցների մասին, որն իհարկե անհանգստացնող է, անընդունելի եւ Հայաստանի կառավարությունն այդ հարցով հստակ դիրքորոշում է արտահայտել»,-եզրափակեց Փաշինյանը:
Արմեն ԴԱՎԹՅԱՆ
