Ադրբեջանի ԱԳՆ պաշտոնական հայտարարություն է տարածել Հայաստանի հետ խաղաղության պայմանագրի տեքստի շուրջ տարվող աշխատանքների ավարտի մասին։
Ընդգծելով, որ այս փաստը Բաքվին «գոհունակություն է պատճառում»՝ ադրբեջանական կողմը կրկնել է նախկինում հնչեցված նախապայմանը՝ փոխել Հայաստանի հիմնական օրենքը։
«Մեկ անգամ ևս ընդգծում ենք Ադրբեջանի սկզբունքային դիրքորոշումը, ըստ որի բանակցված տեքստի ստորագրման գլխավոր պայմանը Հայաստանի Սահմանադրությունում փոփոխությունների կատարումն է, որոնց նպատակը պետք է լինի Ադրբեջանի ինքնիշխանությանն ու տարածքային ամբողջականությանն ուղղված պահանջների վերացումը», -նշված է Ադրբեջանի ԱԳՆ հայտարարության մեջ։
Դրանից բացի Ադրբեջանի դիվանագիտական գերատեսչությունը հայտարարել է, որ Բաքուն շարունակում է ԵԱՀԿ Մինսկի խմբի լուծարում պահանջել, այս կառույցը «հնացած և ոչ ֆունկցիոնալ» որակելով։
Կարդացեք նաև
«Պատրաստ ենք շարունակել երկխոսությունը այս և երկու երկրների հարաբերությունների կարգավորմանը վերաբերող մյուս հարցերի վերաբերյալ», – եզրափակել է Ադրբեջանի ԱԳ նախարարությունը։
