«Որևիցե իրավական հիմք այդ փաստաթուղթը չունի։ Նաև դուք չեք տեսել այն փաստաթուղթը, որ Սամվել Շահրամանյանը հետ է վերցրել իր ստորագրությունը։ Մյուս հարցն այն է՝ Արցախի Հանրապետության նախագահն արդյոք ունի՞ այդ լիազորությունը, որ միայնակ լուծարի ԱՀ-ն»,-Շվեյցարիայի դեսպանատան դիմաց լրագրողների հետ ճեպազրույցում ասաց ԱՀ ԱԺ պատգամավոր Դավիթ Մելքումյանը՝ անդրադառնալով լայն քննարկում ստացած Սամվել Շահրամանյանի՝ 2023-ի սեպտեմբերի 26-ի հրամանագրին։
Նա նշեց՝ լավ գիտեք լուծարման ընթացակարգը ոնց է․ դա տեղի չի ունեցել․ «Արցախի ԱԺ-ն իր աշխատանքը շարունակում է այստեղ։ ԱՀ լուծարման փաստաթուղթը իրավական ուժ չունի, ինչ վերաբերում է նախագահին և բարձրաստիճան պաշտոնյաներին, ապա նրանք ամեն ինչ արել են, որ ԱՀ քաղաքացիների տարհանման գործընթացն առավելագույնս կազմակերպված լինի»։
Դավիթ Մելքումյանի կարծիքով՝ այն, որ ԱՀ լուծարման փաստաթուղթն իրավական հիմք չունի, դրա մասին ոչ թե ինքն է խոսում, այլ իրավաբանությունը․ «Դա ես չեմ ասում, դրա մասին խոսում է իրավաբանությունը։ Եթե իրավական տեսանկյունից վերցնենք, ցանկացած լուծարման գործընթաց ունի հատուկ ընթացակարգ։ Եթե դա տեղի չի ունենում, այդ փաստաթուղթն իրավական հիմք չի կարող հանդիսանալ»։
Կարդացեք նաև
Տաթև ՀԱՐՈՒԹՅՈՒՆՅԱՆ
