Կառավարության այսօրվա նիստից հետո առողջապահության նախարար Անահիտ Ավանեսյանն անդրադարձավ հարցին, թե նախընտրական փուլում իր ներկայությունը Գյումրիում ուղիղ ազդա՞կ չէ, որ Գյումրիում բուժաշխատողներին հրահանգեն ընտրել ՔՊ թեկնածու Սարիկ Մինասյանին։
«Վայ, վայ, վայ։ Այդ անձինք, ովքեր այդ մտավախություններն ունեն, ես նախ հորդորում եմ այդ անձանց շատ հրատապ կերպով այդ բոլոր մտավախությունները հայտնել իրավապահ մարմիններին եւ չվերագրել անձանց մի բան, որի մեջ իրենք շատ լավ մասնագիտացված են եղել»,- ասաց Ավանեսյանը։
Նա նշեց, որ նախարարը եւ կառավարությունը քաղաքական մարմին են, չեն կարող լինել ապաքաղաքական։ Միաժամանակ ասաց․ «Բացառվում է նման հրահանգ, որեւէ ուղղորդում, որովհետեւ դրա կարիքը չկա էլ։ Ես կարծում եմ, որ ՔՊ-ն այս տարիների ընթացքում բավական ձեռքբերումներ ունի, որոնք պետք է ներկայացնի մեր քվեարկողներին։ Եվ վստահ եմ, որ ներկայացնելով, թե ինչ է արվելու Սարիկ Մինասյանի ընտրվելու պարագայում, գյումրեցին իր որոշիչ ձայնը կտա ՔՊ-ի ու Սարիկին»։
Մանրամասները՝ տեսանյութում
Կարդացեք նաև
Կառավարության նիստից հետո Գյումրում ու Փարաքարում սպասվող ընտրություններին անդրադարձավ նաեւ ՆԳ նախարար Արփինե Սարգսյանը։ Մասնավորապես, ահազանգեր կան, որ տարբեր վայրերից մարդկանց գրանցում են Գյումրիում՝ ընտրություններին մասնակցելու համար։ «Թեման ինձ համար շատ անակնկալ էր, որովհետեւ օրենսդրությանը ծանոթ մարդիկ պիտի իմանան, որ այսօր գրանցվելով Գյումրիում կամ Փարաքարում՝ դա չի տալու անձին հնարավորություն՝ մասնակցելու մարտի վերջին ընթացող ընտրություններին, որովհետեւ անձը պետք է ունենա որոշակի ամսական կտրվածքով հաշվառում տվյալ բնակավայրում»,- ասաց նա։
Արփինե Սարգսյանն ասաց, որ ոստիկանությունն իրականացնում է ապաքաղաքական գործունեություն։
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
ՔՊ էջից լուսանկարում՝ Անահիտ Ավանեսյանը Գյումրիում
