Այսօր Հակակոռուպցիոն դատարանում դատավոր Ռուդոլֆ Ավագյանի նախագահությամբ քննվող ապօրինի ծագում ունեցող գույքի բռնագանձման գործով տեղի ունեցած դատական նիստի ընթացքում պատասխանող, արդարադատության նախկին նախարար Դավիթ Հարությունյանը հանդես եկավ սուր քննադատությամբ դատարանի հասցեին:
Նա պնդեց, որ դատարանն օրենքով սահմանված կարգի խախտմամբ չի քննարկել իր կողմից դեռևս փետրվարի 21-ին ներկայացված ապացույցի ապահովման միջնորդությունը:
Հարությունյանը, հղում անելով Քաղաքացիական դատավարության օրենսգրքին, հիմնավորում էր, որ դատարանը պարտավոր էր անհապաղ և առանց դատական նիստ հրավիրելու քննել ապացույցի ապահովման մասին իր միջնորդությունը, ինչը չի արվել: Նա նաև հայտարարեց, որ այս խախտման արդյունքում դատարանն իրեն անվերադարձ կերպով զրկել է ՀՀ գլխավոր դատախազության դեմ իր առարկությունների հիմքում ընկած փաստերն ապացուցելու հնարավորությունից:
Կարդացեք նաև
Ըստ Դավիթ Հարությունյանի, այդ ապացույցը թույլ կտար նրան հիմնավորել, որ գլխավոր դատախազությունը չարաշահել է հայցադիմում ներկայացնելու իրավունքը և հետապնդել է բացառապես իրեն վնաս պատճառելու նպատակ, ինչը հայցադիմումը մերժելու հիմք է:
Գլխավոր դատախազության ներկայացուցիչ Նելլի Տեր-Թորոսյանը հայտարարեց, որ լրացուցիչ ապացույցներ է ձեռք բերել Դավիթ Հարությունյանի նախկինում անհայտ եկամուտների մասին, ուստի հայցապահանջի չափը փոխվում է: Դատարանը հետաձգեց նիստը, որպեսզի հնարավորություն ընձեռի Դավիթ Հարությունյանին ծանոթանալու փոխված հայցապահանջին:
Հաջորդ դատական նիստը կկայանա ապրիլի 30-ին, ժամը 14:00-ին:
Աշոտ ՀԱԿՈԲՅԱՆ
