ՀՀԿ փոխնախագահ Արմեն Աշոտյանի գործով այսօրվա դատական նիստում հարցաքննվեց վկա Արեւիկ Աբրահամյանը, որն աշխատել է Աշոտյանի եւ մյուսների գործով ամբաստանյալ Ռոլան Դավթյանի հետ։ Վկան ասաց, որ ամբաստանյալներից միայն Ռոլան Դավթյանին է ճանաչում, իսկ Արմեն Աշոտյանին հեռուստացույցով է տեսել։
«Ռոլանն ինձ առաջարկեց՝ հնարավորություն կա ՍՊԸ բացել քո անունով, գումարի դիմաց գան հանգստանան քոթեջներում, հետո սնվեն։ Ես համաձայնեցի, ՍՊԸ-ն բացեցինք, գումարը փոխանցվեց, մենք միասին գնացինք բանկ, գումարը ստացանք։ Գումարը բանկից Ռոլանը վերցրեց, ես շարունակեցի իմ աշխատանքը։ Ամառվա ընթացքում ունեցել ենք հանգստացողներ, որ եկել են, սնվել են, բայց ես չեմ իմացել, թե ովքեր են։ Հետո արդեն սեզոնը վերջացավ, 2017 թվականին նորից աշխատել եմ Ռոլանի հետ, էլ չեմ աշխատել։ Հետո ես հարցաքննության ժամանակ իմացա, որ Բժշկականից են գումարը փոխանցել, բայց թե այդ գումարն ինչ է եղել, բացարձակ տեղյակ չեմ»,- ասաց վկան։ Հարցին, թե հանգստացողները նույնպե՞ս Բժշկական համալսարանից էին, նա պատասխանեց, որ տեղյակ չէ։
Ըստ վկայի՝ հանգստյան գոտին եղել է Սեւանի թերակղզում՝ քոթեջներ ու տաղավարներ էին։ Ասաց, որ ինքը եղել է ՍՊԸ տնօրենը, բայց ձեւական, որեւէ փաստաթուղթ չի ստորագրել։ «ՍՊԸ-ն բացել է իմ անունով, գումարը ստացել է Ռոլանը, ես էլ անցել եմ իմ խոհարարությանը, ուրիշ ոչ մի բանից տեղյակ չեմ»,- ասաց նա։
Նշենք, որ Արմեն Աշոտյանը եւ գործով մյուս ամբաստանյալները մեղադրվում են «Երևանի Մխիթար Հերացու անվան պետական բժշկական համալսարան» հիմնադրամում կատարված առերևույթ չարաշահումների գործով։ Աշոտյանը մեղադրվում է պաշտոնեական դիրքի չարաշահման և փողերի լվացման համար, որն առաջացրել է ծանր հետևանքներ։
Կարդացեք նաև
Ռոզա ՀՈՎՀԱՆՆԻՍՅԱՆ
