Հայաստանը Սփյուռքի ներուժը լիարժեք չի օգտագործել եւ չի օգտագործում՝ երկրի տնտեսական զարգացման, տնտեսության դիվերսիֆիկացիայի եւ արտահանման աճի տեսանկյունից. այս կարծիքին է Նյու-Յորքի Սուրբ Ջոնսի համալսարանի պրոֆեսոր Ալեքսանդր Գեւորգյանը: Հայաստանի տնտեսական զարգացման վերաբերյալ իր մոտեցումները Ալեքսանդր Գեւորգյանը բարձրաձայնեց այսօր, «Սպարապետ» կենտրոնի կազմակերպած՝ «Հայաստանի ռազմավարական տնտեսական ընտրությունը՝ ԵՄ, թե՞ ԵԱՏՄ. հեռանկարներ եւ հնարավորություններ Հայաստանի համար» թեմայով քննարկման ժամանակ:
Բանախոսը վերլուծել է Հայաստանի տնտեսական համակարգը՝ 1980-ականներից: «Հայաստանի տնտեսությունը. մակրո հայացք» վերնագրված վերլուծության համաձայն, միջին ցուցանիշներով Հայաստանը լավ դիրքերում է, բայց տնտեսական զարգացումը պետք է արտացոլի քաղաքացիների բարեկեցությունը, կյանքի բարելավումը կարեւոր ցուցանիշ է եւ տնտեսական աճը միայն թվերով չպետք է չափվի:
Պրոֆեսորի կարծիքով, Հայաստանի կայուն զարգացման աճի համար արտահանման կառուցվածքը պետք է վերանայվի: Պետք է կենտրոնանալ համակարգային տնտեսական աճի վրա, ոչ թե վերացական նպատակների՝ հաշվի առնելով աշխարհաքաղաքական զարգացումները, դրանց տնտեսական հետեւանքները: Հիմնական ներուժը պետք է կենտրոնացվի տեղական արդյունաբերական զարգացման եւ արտադրական կարողությունների հզորացման վրա: Ալեքսանդր Գեւորգյանը կարեւոր է համարում՝ նկատի ունենալով երկրի տարածաշրջանային առանձնահատկությունները՝ ինտեգրվել գլոբալ մատակարարման շղթաներին:
Քննարկումն ամբողջությամբ՝ տեսանյութում
Կարդացեք նաև
Նելլի ԳՐԻԳՈՐՅԱՆ
