2025 թվականի հունվարից ուժի մեջ մտած հարկային փոփոխություններից դժգոհող փոքր ու միջին ձեռներեցներն այսօր կրկին կառավարության շենքի մոտ էին:
«Դրական որեւէ քայլ դեռ չենք տեսել, դրա համար, եկել ենք նորից հավաքվենք: Էկոնոմիկայի նախարարը խոստացավ, որ հաճախ կհանդիպենք, կքննարկենք, կլսեն մեր առաջարկները»,-լրագրողների հետ զրույցում ասաց ձեռներեց Կարինեն:
Նրա խոսքով, իրենց պահանջը նույնն է՝ կառավարությունը պետք է վերանայի հարկային փոփոխությունները, կասեցնի ուժի մեջ մտած փոփոխությունները. «Այնպիսի դաշտ թող ստեղծեն, որ գործատուն սիրով վճարի: Ոչ թե մտածենք՝ վայ, այսօր հարկայինը եկավ: Ամեն պայմաններ ստեղծում են, որ մեզ վնասեն, բայց մենք փորձում ենք գոյատեւել»:
Կարդացեք նաև
2025 թվականի հունվարի մեկից շրջանառության հարկը 5 տոկոսից դարձել է 10 տոկոս: Տնտեսվարողները դժգոհում են ոչ միայն շրջհարկի կտրուկ աճից, այլեւ ապրանքի գույքագրման պարտադիր պահանջից. «Ազգի վրա տեռոր է լինելու, փոքր ու միջին բիզնեսի վրա հարձակում է լինելու»:
Լրագրողի դիտարկմանը, թե անցած շաբաթ ոսկու շուկայի աշխատակիցները հանդիպեցին փոխվարչապետ Մհեր Գրիգորյանի հետ ու կարծես թե հարցը լուծում ստացավ, տիկին Կարինեն չհամաձայնեց. «Դա խաբեություն է, Նաիրի Սարգսյանի առաջարկով է եղել(խմբ. ՔՊ-ական պատգամավոր Հայկ Սարգսյանի եղբայրը), երեւի մեր բնագավառում էլ պետք է մի հատ Նաիրի Սարգսյան լիներ, որ մեր հարցն էլ առաջ տանեին: Ծանոթ-բարեկամով է երեւի: Ինձ թվում է Նաիրի Սարգսյանը ոսկու բիզնեսի մեջ կա, եթե բիզնեսմեն է, իր շահերի համար պետք է բանավիճի, էդ ձեւով է բանավիճում»:
Անդրադառնալով Փաշինյանի գրառմանը, թե հայ ժողովուրդն է իրեն բերել իշխանության ու միայն ժողովուրդն էլ կարող է հեռացնել՝ տիկին Կարինեն շարունակեց. «Կարծում եմ՝ Փաշինյանը ատում է հայ ժողովրդին»:
Արփինե ՍԻՄՈՆՅԱՆ
