«Ֆինանսական համակարգում խարդախությունների ճնշող մեծամասնությունն այն դեպքերն են, երբ զեղծարարները ինչ-որ ճանապարհներով սպառողների վստահությունը չարաշահելու միջոցով կարողացել են տիրապետել նրանց անձնական տվյալներին»,- «Արմենպրեսի» մամուլի սրահում կայացած ասուլիսում նշեց Կենտրոնական բանկի զեղծարարության կանխարգելման բաժնի պետ Մարիամ Թովմասյանը:
Նրա խոսքով, վերջին շրջանում ֆինանսական համակարգում գրանցված ու արդեն հայտնի դեպքերը հետեւյալ բնույթի են. «Սպառողներին հղումներ են ուղարկում, սպառողները մուտք են գործում այդ հղումներով՝ լավ չգիտակցելով, թե որտեղից է հղումն ուղարկված, այնտեղ լրացնում են իրենց անձնական տվյալները:
Հաճախ զեղծարարները ներկայանում են ֆինանսական հաստատությունների անվամբ: Դեպքեր ունենք, երբ զանգում եւ բանկի անունից են ներկայանում, օրինակ` ասում են՝ ձեր անունով վարկ է ձեւակերպվել, եւ որպեսզի կարողանանք այդ վարկը չեղարկել, պետք է մուտք գործեք հղումով, որը բնականաբար կեղծ է, եւ լրացնեք ձեր մոբայլ հավելվածի մուտքանունը, գաղտնաբառը, հետո անվտանգության կոդերն են ստանում, ասում են՝ դա էլ պետք է լրացնեք, որպեսզի չեղարկենք այդ վարկը: Այսպիսով տրամադրելով իրենց տվյալները՝ սպառողները դառնում են խարդախության զոհ»:
Մարիամ Թովմասյանը հավելեց, որ հաճախ ներկայանում են որպես այլ երկրի քաղաքացի ու ասում են, որ ժառանգություն ունեք, փոխանցումներ պետք է կատարվեն. «Ցավոք, շատ են դեպքերը, երբ վստահությունը չարաշահելու արդյունքում կարողանում են գումարներ կորզել սպառողներից: Նաեւ կրիպտոներդրումների առաջարկներով են խաբում մարդկանց»:
Կարդացեք նաև
Մանրամասն՝ տեսանյութում ավելի ուշ:
Գոհար ՀԱԿՈԲՅԱՆ
