«Եղիշե Կիրակոսյանի աշխատանքից ազատվելու վերաբերյալ կարող եմ մեկնաբանել այնքանով, որքանով մեկնաբանել է վարչապետի աշխատակազմը․ այն է, որ սեփական դիմումի համաձայն է պարոն Կիրակոսյանն ազատվել եւ սա ամիսների քննարկման արդյունքում է։ Ես հավելյալ տեղեկատվության չեմ տիրապետում»,- այսօր խորհրդարանական ճեպազրույցների ժամանակ ասաց ԱԺ Արտաքին հարաբերությունների մշտական հանձնաժողովի նախագահ, ՔՊ խմբակցության պատգամավոր Սարգիս Խանդանյանը։
Երեկ հայտնի դարձավ, որ Միջազգային իրավական հարցերով ներկայացուցիչ Եղիշե Կիրակոսյանը՝ սեփական դիմումի համաձայն, ազատվելու է պաշտոնից։ Ըստ տեղեկությունների, պատճառն այն է, որ խաղաղության պայմանագրի շրջանակներում Հայաստանը եւ Ադրբեջանը պայմանավորվել են միջազգային ատյաններից ետ կանչել միմյանց նկատմամբ հայցերը։
Ի դեպ, ավելի վաղ Նիկոլ Փաշինյանը հայտարարել էր, որ խաղաղության դեպքում, Հայաստանի համար ընդունելի է միմյանց նկատմամբ հայցերը ետ կանչելը։ Եղիշե Կիրակոսյանն էլ քանիցս հայտարարել էր, որ երկու երկրների միջեւ խաղաղության հաստատմանն այդ հայցերը եւ դրանց հետապնդելը, խոչընդոտ չէ։
Սարգիս Խանդանյանը չցանկացավ այս հարցերն իրար հետ կապել, քանի որ համոզված է՝ նման բան չկա, իսկ եթե հետագայում Եղիշե Կիրակոսյանը հաստատի այդ տեսակետը, իր համար էլ հետաքրքիր կլինի։
Կարդացեք նաև
Իսկ խաղաղության պայմանագրի վերջին՝ 12-րդ խմբագրմանը վերաբերվող հարցին, որն Ադրբեջանն ուղարկել է, ՔՊ-ական պատգամավորը պատասխանեց, որ ինչպես հայտարարվել է՝ երկու հարցերի վերաբերյալ անհամաձայնություններ կան, դրանք քննարկվում են, առաջիկայում Հայաստանը կներկայացնի իր պատասխանը։
Մանրամասները՝ տեսանյութում
Նելլի ԳՐԻԳՈՐՅԱՆ
