Լրահոս
Օրվա լրահոսը

Թրամփի պնդմամբ՝ վերջ է դրել ԱՄՆ-ում ազատ խոսքի գրաքննմանը պետության կողմից. «Ազատ խոսքը վերականգնված է»

Մարտ 05,2025 11:56

Լսել նյութի աուդիո տարբերակը

Ձայնագրությունը գեներացված է Armenian Text to Speech արհեստական բանականության միջոցով, որն այս պահին գտնվում է թեստավորման փուլում

«Պաշտոնս ստանձնելով՝ ես անմիջապես սառեցրի դաշնային կառավարությունում աշխատանքի ընդունումը, բոլոր նոր դաշնային կարգավորումները եւ արտաքին ամբողջ օգնությունը»։ Ներկայացուցիչների տան խոսնակ Մայք Ջոնսոնի եւ փոխնախագահ, Սենատի նախագահ Ջեյ Դի Վենսի նախագահությամբ կայացած Կոնգրեսի երկու պալատների համատեղ նիստի ժամանակ այս մասին հայտարարել է ԱՄՆ նախագահ Դոնալդ Թրամփը։ Իր այս խոսքին հաջորդել են հանրապետական կոնգրեսականների ծափողջյունները, մինչդեռ դեմոկրատները լուռ են մնացել։

 

Լքած կազմակերպություններ, վերականգնված ազատ խոսք, միգրացիայի սառեցում եւ երկու սեռ

Նախագահը նաեւ թվարկել է մի քանի ծրագրեր եւ կազմակերպություններ, որոնցից նա դուրս է բերել Միացյալ Նահանգները։ Դրանք են՝ «սուտ» կանաչ քաղաքականությունը, Փարիզի կլիմայական «անարդար» համաձայնագիրը, «կոռումպացված» Առողջապահության համաշխարհային կազմակերպությունը եւ ՄԱԿ-ի «հակաամերիկյան» մարդու իրավունքների խորհուրդը։

Թրամփի խոսքով՝ նա վերջ է դրել ԱՄՆ-ում ազատ խոսքի գրաքննմանը պետության կողմից։ «Ազատ խոսքը վերականգնված է», – հայտարարել է ԱՄՆ նախագահը։

Նախագահն իր ուղերձի ժամանակ վերահաստատել է արդեն հայտնի տեսակետներն անօրինական միգրացիայի անթույլատրելիության մասին։ Թրամփը հայտնել է, որ անօրինական ներգաղթյալների թիվը ռեկորդային ցածր ցուցանիշ է գրանցել, քանի որ նա ասել է, որ ԱՄՆ չգան։

Նիստին հրավիրված էին անօրինական ներգաղթյալների կողմից սպանված մի քանի ամերիկացու ընտանիքի անդամներ։

 

Դոնալդ Թրամփը վերստին նշել է, որ ԱՄՆ պաշտոնական քաղաքականությունն է՝ կա երկու սեռ՝ արական եւ իգական։

Այս համատեքստում նա գովերգել է իր կառավարության կարգադրությունն առ այն, որ արական սեռի ներկայացուցիչները չեն կարող միանալ կանանց սպորտային թիմերին։ Նիստին Թրամփը հրավիրել էր մի երիտասարդ սպորտսմենուհու, որը տղամարդ թիմակցի կողմից գնդակի ուժեղագույն հարվածի հետեւանքով ուղեղի ցնցում էր ստացել եւ ստիպված եղել դադարեցնել կարիերան։

 

Ի՞նչ ուղերձ էր սա

 

Իր երկրորդ նախագահության ընթացքում սա Դոնալդ Թրամփի առաջին ուղերձն է, իսկ ընդհանուր՝ հինգերորդը։

Միացյալ Նահանգների Սահմանադրության երկրորդ գլխի երրորդ հոդվածը նշում է՝ «Նա [նախագահը] ժամանակ առ ժամանակ պետք է Կոնգրեսին տեղեկատվություն տրամադրի Միության վիճակի մասին եւ նրանց [կոնգրեսականների] ուշադրությանը ներկայացնի միջոցներ, որոնք նա համարում է անհրաժեշտ եւ նպատակահարմար»։

Ըստ ավանդույթի՝ ԱՄՆ նախագահը Կոնգրեսում այս ուղերձով հանդես է գալիս տարեկան մեկ անգամ, սովորաբար գարնանը։

Արսեն ԱՅՎԱԶՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Մարտ 2025
Երկ Երե Չոր Հնգ Ուրբ Շաբ Կիր
« Փետ   Ապր »
 12
3456789
10111213141516
17181920212223
24252627282930
31