Չնայած 10-ից ավելի քաղաքական ուժեր հայտարարել են Գյումրու արտահերթ ՏԻՄ ընտրություններին իրենց մասնակցության մասին, շատերն էլ դեռ քարոզարշավը չսկսած՝ ցուցապաստառներ են փակցրել, թիվ 31 ընտրատարածքային ընտրական հանձնաժողով մինչ այս պահը երեք քաղաքական ուժեր են ներկայացրել փաստաթղթերը։
Իսկ վաղը՝ մարտի 5-ին կլրանա առաջադրումների ժամկետը։ ՀՀ Ընտրական օրենսգրքի 128 հոդվածի, 5-րդ մասի համաձայն՝ ընտրություններին մասնակցելու ցանկություն ունեցող քաղաքական ուժերը փաստաթղթերը կարող են ներկայացնել քվեարկության օրվանից ոչ ուշ, քան 25 օր առաջ՝ այսինքն մինչև մարտի 5-ը՝ ժամը 18․00-ը։ Իսկ ընտրական ցուցակների գրանցումը տեղի կունենա հինգօրյա ժամկետում։
Թիվ 31 ընտրատարածքային ընտրական հանձնաժողովի նախագահ Տիգրան Ղազարյանը մեզ հետ զրույցում տեղեկացրեց, որ փաստաթղթեր ներկայացրել է՝ «Կոմունիստական կուսակցությունը», որի ցուցակը գլխավորում է Գյումրու նախկին քաղաքապետ Վարդան Ղուկասյանը, «Իմ հզոր համայնք» կուսակցությունը, որի ցուցակը գլխավորում է պրոդյուսեր Ռուբեն Մխիթարյանը և քիչ առաջ իր փաստաթղթերն է ներկայացրել «Գյումրեցու որոշում» կուսակցությունը ներկայացնող Արտյոմ Թումանյանը։ Ի դեպ, «Կոմունիստական կուսակցությունը» ամենաառաջինն է առաջադրվել։
Վաղը լարված օր է սպասվում հանձնաժողովականների համար։
Կարդացեք նաև
Իշխող ուժը՝ «Քաղաքացիական պայմանագիր» կուսակցությունը դեռ իր փաստաթղթերը չի ներկայացրել, մեր տեղեկություններով, այն 99 հոգանոց ցուցակ է ներկայացնելու․ ենթադրելի է, որ ՔՊ-ն բոլոր քաղաքական ուժերի մեջ ամենաշատ թեկնածուներ ունեցողն է։
Մեր տեղեկություններով, Սարիկ Մինասյանի գլխավորած ցուցակը եզրափակում է Շիրակի մարզպետ Դավիթ Առուշանյանը, այսինքն՝ նա 99-րդ տեղում է։
Վարչապետ Նիկոլ Փաշինյանի մամլո խոսնակ Նազելի Բաղդասարյանը, նշելով գյումրեցի ՔՊ-ական պատգամավորներ Կարեն Սարուխանյանին ու Էմմա Պալյանին, ինչպես նաև Շիրակի նախկին մարզպետ, Գյումրու քաղաքապետի նախկին թեկնածու Հովհաննես Հարությունյանին, իր ֆեյսբուքյան էջում տեսանյութ է տեղադրել՝ տեղեկացնելով, որ տեղեկանք է վերցրել հաշվառման մասին, որպեսզի ՏԻՄ ընտրություններում լինի «Մեր Սարիկի» կողքին՝ ավագանու ցուցակում։ Նա նշել է, որ նախընտրական քարոզարշավը թեժ է լինելու։
Նունե ԱՐԵՎՇԱՏՅԱՆ
