ԱԺ նախագահ Ալեն Սիմոնյանը խորհրդարանում լրագրողների հետ ճեպազրույցում անդրադարձավ Նիկոլ Փաշինյանի այսօրվա հոդվածին եւ հարցին, թե արդյոք էսկալացիայի վտանգ կա՞, ինչի մասին Փաշինյանն ակնարկում է իր հոդվածում։
Նա նշեց, որ Բաքվի հետ քննարկումը շարունակվում է, այսօր ունեն առնվազն 15 համաձայնեցված կետ, որն Ալեն Սիմոնյանը շատ մեծ ձեռքբերում համարեց։
«Էսկալացիայի պատճառներ ստեղծելու հետ կապված մենք միշտ պետք է ամեն ինչ անենք, որ նման առիթ եւ պատճառ չլինի։ Հայաստանի Հանրապետությունը, բազմիցս ասել ենք, որեւիցե տարածքային պահանջ չունի եւ իր հանձն առած պարտավորություններին եւ համաձայնագրերին շատ ուժեղ հետեւում է։ Եվ հետեւողական շարունակելու է աշխատանքները բոլոր խնդրահարույց հարցերը լուծելու ուղղությամբ։ Էսկալացիայի վտանգ կա, բայց էսկալացիայի առիթ եւ պատճառ, կարծում եմ, չկա եւ պետք է չլինի»,- ասաց Ալեն Սիմոնյանը։
Միաժամանակ, Սիմոնյանն ասաց, որ յուրաքանչյուր պահի կարող է յուրաքանչյուր բան տեղի ունենալ, ոչինչ չպետք է բացառել։ «Ես չեմ ուզում շատ մանրամասնել վարչապետի ասածը, որովհետեւ այս շաբաթվա ընթացքում ընդդիմադիր պատգամավորներն իրեն հարց տալու հնարավորություն կունենան։ Էլ չեմ ասում, որ իրադարձություններն այնպես արագ են զարգանում, կարող են շատ հետաքրքիր զարգացումներ լինել։ Մեր այս ընդհանուր թեմայի շուրջ, որի շուրջ զրուցում ենք, կարող են նորություններ ու փոփոխություններ տեղի ունենալ։ Մեր պատասխանը գնա Ադրբեջան այս շաբաթվա ընթացքում, խաղաղության պայմանագրի հետ կապված․․․»,- հավելեց նա։
Կարդացեք նաև
Անդրադառնալով հարցին, թե ապաշրջափակման հարցով գրավոր պատասխան չի ստացվե՞լ Ադրբեջանից, Ալեն Սիմոնյանը պատասխանեց․ «Ինչքան ժամանակ է՝ մենք ասում ենք, նույնիսկ կառավարության որոշում կա, որ մենք պատրաստ ենք անցակետեր տեղադրել եւ ճանապարհները բացել։ Սա գործընթաց է, որը չի դադարում»։
Անդրադառնալով Նիկոլ Փաշինյանի այն մտքին, թե միակողմանի որեւէ գործընթաց չպետք է լինի, Ալեն Սիմոնյանն ասաց․ «Մինչեւ հիմա չի էլ եղել»։
Ռոզա ՀՈՎՀԱՆՆԻՍՅԱՆ
