«Իրականում բյուջեն կշահի շատ փոքր գումար, իմ հաշվարկով` 25-30 միլիոն դոլար, բայց հասարակության այլասերումը կշարունակվի»,- այսօր խորհրդարանում ՔՊ խմբակցության պատգամավոր Հայկ Սարգսյանին դիմեց «Հայաստան» խմբակցության պատգամավոր Աղվան Վարդանյանը։ Հայկ Սարգսյանը ներկայացնում էր Հարկային օրենսգրքում փոփոխությունների փաթեթը, որը վերաբերում է առցանց շահումով խաղերի նկատմամբ հարկերի եւ տուրքերի բարձրացմանը։ Աղվան Վարդանյանը ՔՊ-ական պատգամավորին առաջարկեց մտածել շատ ավելի համապարփակ լուծումների մասին։
Հայկ Սարգսյանի ներկայացրած վիճակագրության համաձայն՝ 2010 թվականին շրջանառությունը կազմել է 35 միլիոն դոլար, հարկերը՝ 7,2 տոկոս։ 2023-ին՝ 15 միլիարդ դոլար, հարկերի հարաբերակցությունը՝ 0,4 տոկոս։
Այս նախագծին դեմ են արտահայտվել թե ՔՊ-ական շատ պատգամավորներ, թե կառավարության պատկան մարմինները, բայց, ինչպես իր խոսքում նշեց Հայկ Սարգսյանը, կողմ է արտահայտվել վարչապետ Նիկոլ Փաշինյանը։ Նախագծով առաջարկվում է առկա հարկերից եւ տուրքերից բացի՝ ոլորտը հարկել 10 տոկոս շրջանառության հարկով։ Մինչդեռ հավաքագրվող հարկերը եւ տուրքերը աճել են ընդամենը 26 անգամ: Շրջանառության ծավալի եւ վճարված հարկերի հարաբերակցությունը նվազել է ավելի քան 14 անգամ:
Մանրամասները՝ տեսանյութում
Կարդացեք նաև
Նախագծի համահեղինակ Բաբկեն Թունյանն ավելի ուշ հայտարարեց, որ վարչապետի մոտ ձեռք բերված պայմանավորվածության համաձայն` ըստ էության, ոլորտի պետական տուրքը կրկնապատկվում է։ Նախագիծն ուժի մեջ է մտնելու ընդունումից հետո՝ անմիջապես։
Նելլի ԳՐԻԳՈՐՅԱՆ
