Խնկո Ապոր անվան ազգային մանկական գրադարանում գարնանամուտը նշանավորվեց «Երազող տիեզերք» մանկական գրքի շնորհանդեսով: Հեղինակը երիտասարդ գրող Սոնէն է, որի գործերը տպագրվել են մի շարք մշակութային հանդեսներում եւ պարբերականներում:
«Երազող տիեզերքը» հեղինակի առաջին գիրքն է` հեքիաթ-պատմվածք նախատեսված պատանի ընթերցողների համար (Հրատարակիչ` «Զանգակ» հրատարակչություն, գրքի խմբագիր` Սամվել Մուրադյան, նկարիչ` Էդուարդ Մուրադյան):
Կարդացեք նաև
«Երազող տիեզերքը» սիրո, բարության, երազանքի ուժի եւ սեփական ուժերին հավատալու մասին է։ Լիլիա ծաղկի մոգական ճամփորդությունը նոր ու անծանոթ աշխարհներ են բացահայտում, միաժամանակ տալիս հարցեր, զրուցում ընթերցողի հետ: Պատրա՞ստ ենք արդյոք խիզախել, նվիրել ու նվիրվել, գնալ զոհաբերության, լինել սրտակից մեզ այնքան հեռու ու մոտ աշխարհների, մարդկանց հանդեպ: Սրանք հարցեր են, որոնց պատասխանները ընթերցողը պետք է փնտրի թե գրքում, թե իր մեջ:
Շնորհանդեսը տեղի ունեցավ ինտերակտիվ ձեւաչափով, գրադարանի պատանի ընթերցողները բեմականացրել էին հեքիաթը, որից հետո ջերմ ու անկաշկանդ մթնոլորտում տեղի ունեցավ հարց ու պատասխան հեղինակի հետ:
«Հավատ՝ իր երազանքների իրականացման հանդեպ։ Ուժ՝ հաղթելու իր վախերին»,-սա այն է, ինչ Սոնէն ուզում է, որ յուրաքանչյուր ընթերցող գտնի «Երազող տիեզերքում»:
Գիրքը հասանելի է «Զանգակ», «Բուկինիստ», «Ֆենիքս» գրախանութների ցանցերում թե հայերեն, թե անգլերեն լեզուներով:
