Հարգելի՛ գյումրեցիներ, սիրելի՛ թիմակիցներ
Գյումրին փոփոխությունների շեմին է։
Մենք պետք է միասնաբար ձերբազատվենք «Քաղաքացիական պայմանագրի» կառավարումից ու Գյումրիի համար զարգացման դուռ բացենք։
Ամիսներ առաջ ես նախաձեռնել էի Գյումրիի զարգացման ծրագրի վերաբերյալ քննարկումներ, որոնց արդյունքում ծնվեց մի փաստաթուղթ, որի համաձայն Գյումրիի երկարաժամկետ զարգացման համար պետք է կյանքի կոչել Ազատ տնտեսական գոտու ներդրման և մեր քաղաքում հարկային ռեժիմի առումով ազատ քաղաքի գաղափարը:
Ազատ տնտեսական գոտու ստեղծման մասին շատ է խոսվել, բայց ամեն ինչ մնացել է թղթի վրա: Պատճառն այն է, որ գյումրեցիները պահանջատեր չեն եղել այս հարցում: Մինչդեռ մենք պետք է ամեն ինչ անենք, որպեսզի Գյումրին աղետի գոտի հասկացությունից ձերբազատվի և դառնա զարգացման գոտի:
Պահանջատեր լինելու համար անհրաժեշտ էր գյումրեցիների մասնակցությունը և դրա լավագույն ձևը օրենքով սահմանված կարգով ստորագրահավաքի իրականացումն էր, և մենք այն նախաձեռնեցինք: Հայաստանի պատմության մեջ չի եղել դեպք, երբ համայնքի բնակիչները դառնան ուղերձի նախագծի հեղինակ: Գյումրին առաջինը կլինի այս առումով և օրինակ կծառայի մյուս համայնքների համար:
Կարդացեք նաև
Այդ ուղերձով ավագանին պետք է հայտարարի, որ պահանջում է կյանքի կոչել ազատ տնտեսական գոտու և ազատ քաղաքի ծրագիրը, որը նախատեսված է 25 տարվա համար:
Համոզված եմ, որ եթե ժամանակը ներեր, ապա մենք ստորագրահավաքի ժամանակ 7.700-ի փոխարեն 77 հազարի աջակցությունն էլ կստանայինք: Ու քանի որ մեր ծրագրին միացել են մեծ թվով գյումրեցիներ, ես նաև նրանց անունից կարող եմ ծրագիրը ներկայացնել Գյումրիի ավագանու արտահերթ ընտրություններին՝ առաջադրվելով որպես քաղաքապետի թեկնածու:
Ես շնորհակալ եմ այն հազարավոր քաղաքացիներին, ովքեր բարձր լեգիտիմություն տվեցին այդ ծրագրին:
Հարգելի՛ գյումրեցիներ,
Գալիք ընտրություններին ակնկալում ենք ձեր աջակցությունը, որպեսզի փոխենք մեր քաղաքում տիրող իրավիճակը և կարողանանք հասնել հեռանկարային զարգացման ծրագրի իրագործմանը: Մեր հազարավոր հանդիպումների ժամանակ ես գույքագրել եմ այն խնդիրները, որոնց մասին իշխող ուժի չինովնիկներից շատերը նույնիսկ չգիտեն:
Շիրակի մարզն ու Գյումրին համարվում են սոցիալապես ամենախոցելի բնակավայրերից: Դա մենք գիտենք վիճակագրությունից: Բայց մի բան է վիճակագրությունը, մեկ այլ բան այն կոնկրետ ճակատագրերը, որոնց հանդիպել ենք ստորագրահավաքի ընթացքում: Սոցիալական քաղաքականության օպտիմալացման անվան տակ մարդկանց պարզապես թողել են բախտի քմահաճույքին, զրկել պետական աջակցության սոցիալական ծրագրերից: Դա հակամարդկային վերաբերմունք է:
Ինչ վերաբերում է ընտրություններին:
Բոլորդ էլ գիտեք, որ Գյումրիում ստվերային գործընթացների ու ճնշումների միջոցով «Քաղաքացիական պայմանագրի» կողմից տեղի է ունեցել իշխանազավթում: Արհամարհվել կամ ավելի ճիշտ՝ գողացվել է գյումրեցու քվեն: Հիմա էլ ընտրություններին ընդառաջ որդեգրել են «Ինչքան ուզեք, էնքան խփենք» տխրահռչակ գործելաոճը: Գյումրեցին մեկ անգամ արդեն մերժել է այդ գործելաոճի հեղինակներին: Համոզված եմ, որ հիմա էլ կմերժի այդ ամենը սեփականաշնորհողներին: Նաև կմերժի այն թեկնածուին, ով հայտարարում է, թե, իբր, մենք չենք կռվել ու դրա համար է Արցախը հանձնվել։ Դա դատապարտելի հայտարարություն է և պատասխանը ստանալու է գյումրեցու կողմից։
Գյումրիի մեր թիմը ընտրություններին մասնակցում է «Մայր Հայաստան» դաշինքով։ «Մայր Հայաստանով» առաջադրվելու մեր որոշումը շատ բնական է: Գաղափարական ու քաղաքական առումով դաշինքի մոտեցումները մեր թիմը կիսում է ամբողջությամբ։ Մենք մեր քաղաքական դիրքորոշումը թաքցնելու կամ ամաչելու ոչինչ չունենք։Բացի այդ՝ «Մայր Հայաստան» շարժման առաջնորդ Անդրանիկ Թևանյանի հետ ես ունեմ երկար տարիների անձնական, ընտանեկան մտերմություն: Մենք փորձություններով լի համատեղ ճանապարհ ենք անցել և այդ ճանապարհը շարունակում ենք միասնաբար:
Նշեմ նաև, որ «Մայր Հայաստանը» Գյումրին ազատ տնտեսական գոտի դարձնելու ծրագրի հեղինակն է։ Ու քանի որ հարցը համապետական նշանակություն ունի, հասկանալի է, թե ինչու ենք մենք համատեղ առաջ մղում այդ գաղափարը: Որպեսզի ամբողջական իշխանափոխության նպատակ ունեցող «Մայր Հայաստանը» հետագայում տեր կանգնի այդ գաղափարին և արձագանքի գյումրեցու պահանջներին։
Մեր քաղաքն ու գյումրեցիներն ունեն բոլոր հնարավորությունները մեր սիրելի Գյումրին դարձնելու Հայաստանի մշակութային ու բիզնես մայրաքաղաք: Դրա համար անհրաժեշտ է ծրագիր, թիմ, սրտացավություն և գյումրեցու ջիղ: Մենք այդ ամենն ունենք և ակնկալում ենք գյումրեցու քվեն:
Մենք անձնական վիրավորանքների դաշտ չենք մտնելու, բայց քաղաքական, գաղափարական ու գյումրեցու շահի պաշտպանության առումներով կլինենք կոշտ և անզիջում՝ «Քաղաքացիական պայմանագրի» և այդ ուժին կցված «Եվրաքվեի» դեմ պայքարում: Մնացածի մասով հետո շատ առիթներ կլինեն խոսելու:
Գյումրին պետք է կանգնի ամու՛ր։ Գյումրին պետք է խոսի բա՛րձր։
Գյումրին պետք է հաղթի վստա՛հ։
Պետք է փոխվի՛ մտածողությունը, ջարդվի՛ անտարբերությունը, ԵՎ պե՛տք է
հաղթի համառությունը։
Պետք է հույսը փոխարինվի վստահությամբ, խոսքը՝ գործով, սպասումը՝ իրականությամբ։
Գյումրին պետք է առաջ գնա։ Պետք է հավատա իր ուժին։ Պետք է բարձրացնի իր ձայնը։
Համախմբվելու, կառուցելու, պայքարելու ժամանակն է։ Գյումրին պետք է հաղթի։
Ես չեմ եկել խոստումներ տալու, ես եկել եմ գործ անելու։
Ես առաջադրվում եմ Գյումրու քաղաքապետի պաշտոնում, որովհետև հավատում եմ մեր քաղաքին, մեր մարդկանց, մեր ապագային։ Ես ունեմ կամք, վճռականություն, անսասան հավատ՝ մեր քաղաքը շենացնելու և կերտելու վաղվա հպարտությունը։
Ես վստահ եմ՝ գյումրեցին միասին պետք է հաղթի։ Վստահ եմ՝ մենք միասին պետք է վերականգնենք մեր քաղաքի հզորությունը։
Այս պայքարը միայն իմը չէ, սա բոլորիս պայքարն է։ Ես վստահ եմ, որ միասին կարող ենք փոխել մեր քաղաքի ապագան, վերադարձնել Գյումրիին իր երբեմնի փառքը։ Հիմա է պահը գործելու, հիմա է պահը միասին առաջ գնալու։
Շնորհակալ եմ ձեր վստահության համար։ Եկեք միասին կառուցենք այն Գյումրին, որը բոլորս երազում ենք։
Բոլորիս մաղթում եմ կամք, վճռականություն և հաղթանակ:
Սիրելի՛ գյումրեցիներ,
Աջակցե՛ք ու միացե՛ք մեզ:
Միացե՛ք, որ փոխենք:
Կարեն ՍԻՄՈՆՅԱՆ
ԳՅՈՒՄՐՈՒ ՔԱՂԱՔԱՊԵՏԻ ԹԵԿՆԱԾՈՒ
