ԱԻՄ առաջնորդ Պարույր Հայրիկյանն այսօր հանրահավաք էր հրավիրել հանրապետության հրապարակում:
Նրա դիտարկմամբ՝ ՀՀ քաղաքական ուժերի ու ժողովրդի հիմնական մասն ուզում են, որ իրեն չարդարացրած Նիկոլ Փաշինյանը հեռանա. « Միայն Ռուբեն Վարդանյանի բարձրացրած հարցը բավական է ընդունելու, որ վարչապետն իր տեղում չէ: Չեկիստի որդի Ալիեւը աշխատում է նույն չեկիստական ոգով, պատանդ է պահում մարդկանց ու այդ պայմաններում հանկարծ ՀՀ ղեկավարը համարում է, որ նրա հետ կարելի է խաղաղության պայմանագիր կնքել: Նույնիսկ միասին հայտարարություն են ընդունել, որ գերիներ չպետք լինեն, բայց թույլ է տալիս, որ պատանդներ լինեն այն էլ խաղաղ պայմաններում»:
Պարույր Հայրիկյանի խոսքով, երեք ամսում հնարավոր է Փաշինյանին հեռացնել իշխանությունից. «Ենթադրենք Նիկոլը զարթնեց ու հեռացավ, մենք պետք է հասկանանք, որ վաղը նույն վիճակի առաջ կարող ենք կանգնել: Կարեւոր է, որ հենց սկզբից իմանանք՝ որն է ճանապարհը: Ամենակարեւորը քաղաքացիների՝ երկրի կառավարմանը իրավահավասար կերպով մասնակցելու իրավունքի ապահովումն է»:
Ըստ Հայրիկյանի՝ Նիկոլ Փաշինյանին հեռացնելու են ոչ թե այնպես, ինչպես երազում են շատերը, այլ օրինակ. «Հավաքվում ենք կես միլիոն մարդկանցով ու Փաշինյանն ամաչում է կամ վախենում է ու հեռանում: Դա երեք ամսում կարելի է»:
Կարդացեք նաև
Պարոն Հայրիկյանը նկատեց, որ Փաշինյանը երբեմն շահարկում է, որ ինքը 600.000-700.000 ձայն է ստացել. «Հիմա իր հետ խոսում է մի մարդ, որը ստացել է 2 միլիոն 400.00 ձայն անկախության հանրաքվեի ժամանակ: Հիմա ես այդ 2 միլիոն 400.000 մարդու անունից ասում եմ՝ դու նամո՞ւս չունես»:
Հանրահավաքի ժամանակ ընթերցվեց նաեւ Պարույր Հայրիկյանի դիմումները՝ ուղղված գլխավոր դատախազին ու Հակակոռուպցիոն կոմիտեի ղեկավարին:
Պարույր Հայրիկյանը իրավապահների ուշադրությունն է հրավիրում Նիկոլ Փաշինյանի կոռուպցիոն գործողությունների վրա. «Հայաստանի վարչապետի կողմից դեռեւս 2020 թվականից սկսված եւ այդպես էլ կյանքի չկոչված սահմանադրական բարեփոխումների գործը իրականում ծավալուն, խմբակային կոռուպցիոն հանցագործության քողածածկույթ է»:
Արփինե ՍԻՄՈՆՅԱՆ
