«Միջազգային հանրությունից հիասթափությունն անսահման է, և կարծում եմ՝ ոչ միայն հայ ժողովրդի, այլև աշխարհում մարդու իրավունքների վրա հույս դրած անձանց շրջանում»,- ՄԱԿ-ի Երեւանի գրասենյակի դիմաց՝ ի պաշտպանություն հայ գերիների բողոքի ցույցի ժամանակ լրագրողների հետ ճեպազրույցում հայտարարեց Արցախի ՄԻՊ Գեղամ Ստեփանյանը։
Միևնույն ժամանակ նկատեց՝ այս պարագայում անգամ անգործությունը հաստատ ավելի լավ չէ, քան որոշակի գործողություններ իրականացնելը։ Լրագրողների հարցին՝ այն, ինչ տեղի է ունենում Բաքվում մեր պատանդների հետ՝ այդ՝ այսպես կոչված դատավարությունները որևէ ձևով տեղավորվո՞ւմ են մարդու իրավունքների միջազգային նորմերի սահմաններում, Գեղամ Ստեփանյանը պատասխանեց․ «Իհարկե, չի տեղավորվում։ Անգամ նրանց՝ այնտեղ գտնվելը, չեմ ասում պահման պայմանները, առողջական վիճակը հասկանալը չի տեղավորվում միջազգային իրավունքի նորմերի սահմաններում։ Միջազգային իրավունքը տալիս է իրավունք ինքնորոշման համար անգամ զենքի դիմել, եթե ժողովուրդը գնում է իր ինքնորոշումն իրացնելու համար։ Դրանում որևէ հակաիրավ բան չկա։ Այն, ինչ կատարվում է Բաքվում, որևէ ձևով իրավական գործընթաց անվանել չենք կարող։ Սա քաղաքական ֆարս է, Իլհամ Ալիևի վրեժխնդրության հետևանք»։
Անդրադառնալով ՀՀ ԱԳՆ-ի տարածած հայտարարությանը՝ նա ասաց․ «ՀՀ ԱԳՆ-ն մեղմ ասած ոչինչ չասող հայտարարություն արեց։ Տարածված լուսանկարներն ամենավառ ապացույցներից մեկն են այն բանի, ինչի մասին տևական ժամանակ բարձրաձայնում ենք»։
Կարդացեք նաև
Անդրանիկ Քոչարյանի հայտարարությունների առիթով էլ ասաց․ «ԱԺ այդ պատգամավորը շատ ավելի ճիշտ կանի, որ չխոսի։ Դա լավագույն բանն է, որ նա կարող է անել»։
Ըստ Գեղամ Ստեփանյանի՝ եթե պայքարի այս տեմպը շարունակվեց, ՀՀ իշխանությունները ստիպված են լինելու խաղաղության բանակցություններում մտցնել նաև պատանդների վերադարձի հարցը։
Տաթև ՀԱՐՈՒԹՅՈՒՆՅԱՆ
