«Այն, ինչ այսօր կատարվում է մեզ հետ, դա ուղիղ շարունակությունն է Սումգայիթում, Բաքվում, Գանձակում եւ այլ վայրերում տեղի ունեցածի։ Եվ ինչ-որ առումով նաեւ պատճառն այն է, որ այդ անպատժելիությունը միգուցե նաեւ մեր ոչ համապատասխան աշխատանք տանելու հետեւանք է՝ 1990-ականների հաղթանակից հետո միջազգային հանրության շրջանում հայ ժողովրդի իրավունքների պաշտպանության հարցով ակտիվ աշխատանք չի տարվել»- 1988-1992 թվականներին ադրբեջանական իշխանությունների կողմից իրականացված զանգվածային ջարդերի զոհերի հիշատակին նվիրված միջոցառման ժամանակ ասաց Արցախի մարդու իրավունքների պաշտպան Գեղամ Ստեփանյանը։
Նա նշեց, որ այդ ընթացքում Բաքվի ռեժիմն ամեն ինչ արել է՝ իր կեղծ նարատիվներն առաջ մղելու եւ հայկական նարատիվների դեմ պայքարելու համար։
«Բաքվում գտնվող մեր հայրենակիցների նկատմամբ անմարդկային վերաբերմունքի մասին բազմիցս խոսել ենք։ Հրապարակվել են զեկույցներ՝ մանրամասն ներկայացնելով խոշտանգումների ապացույցները։ Եվ ամենավերջին ապացույցը Ռուբեն Վարդանյանի՝ օրերս տարածված նկարն է, որի վրա շատ հստակ երեւում են խոշտանգման հետքերը։ Սա եւս մեկ անգամ վերահաստատեց մեր բոլոր մտահոգություններն ու մտավախությունները խոշտանգման եւ կտտանքների վերաբերյալ։ Այսինքն՝ որեւէ կասկած չունեինք էլ, որ այդպիսին է իրավիճակը, բայց սա եւս մեկ անգամ եկավ վերահաստատելու մեր մտահոգությունները։ Ըստ այդմ՝ մենք ուղղակի իրավունք չունենք գոնե մեկ օր հապաղելու, պետք է մոբիլիզացնել բոլոր ջանքերը՝ Հայաստանում, Սփյուռքում, արտերկրում մեր բարեկամների շրջանում՝ օր առաջ մեր հայրենակիցներին հայրենադարձնելու համար»,- ասաց Գեղամ Ստեփանյանը։
Կարդացեք նաև
Նշենք, որ Ադրբեջանի ցեղասպանական գործողությունների զոհերի հիշատակի եւ բռնագաղթված հայության իրավունքների պաշտպանության օրը հարգանքի տուրք մատուցվեց 1988-1992 թվականներին ադրբեջանական իշխանությունների կողմից իրականացված զանգվածային ջարդերի զոհերի հիշատակին։ 1988 թվականի փետրվարի 27-29-ը տեղի են ունեցել Սումգայիթի հայերի ջարդն ու բռնի տեղահանությունը։
Միջոցառման կազմակերպիչներն ընդգծում են՝ 1988-1992 թվականներին ադրբեջանական իշխանությունների կողմից իրականացված զանգվածային ջարդերը շարունակվում են մինչ օրս՝ այլատյացության քաղաքականությամբ, պատմական ժառանգության ոչնչացմամբ, քաղաքական ու ռազմական ագրեսիայով, Արցախի քաղաքական եւ ռազմական ղեկավարության, գերեվարված մեր մյուս հայրենակիցների նկատմամբ Ադրբեջանում ընթացող ապօրինի դատավարություններով։
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
