«Մարդիկ հարցեր ունեն․ ինչի եք գնացել։ Ինչի եք գնացե՞լ, որովհետև դուք դա չեք անի, դրա համար էլ հարցեր ունեք։ Դուք ձեր փափուկ տեղը չեք թողնի, գնաք Արցախ, դրա համար էլ այդպիսի հարցեր ունեք»,- ՀՀ կառավարության առաջ, ի զորակցություն Բաքվի բանտերում գտնվող հայեր,ի բողոքի ցույցի ժամանակ հայտարարեց Արցախի Հանրապետության աշխատանքի, սոցիալական և բնակարանային հարցերի նախկին նախարար, «Ապրելու երկիր» կուսակցության համահիմնադիր Մանե Թանդիլյանը։
Նա, դիմելով իշխանության կողմից այս առիթով հայտարարություններ անողներին, ասաց․ «Եթե զգայիք այն, ինչ Ռուբեն Վարդանյանն է զգում, դուք էդ հարցերը չէիք ունենա․ վեր կկենայիք ու կգնայիք։ Վախից ծվարել էիք այստեղ, երբ Արցախի ժողովուրդը մտածում էր, որ իրենց մոռացել եք։ Մոռացության եք ուզում մատնել նաև այս մարդկանց, որոնք մինչև վերջին շունչը Արցախում պայքարում էին։ Ստոր եք դուք՝ բոլորդ, ովքեր հարցնում եք բա ինչի՞ չեք կռվել։ Դուք ո՞վ եք, գիտեի՞ք՝ այնտեղ ինչ էր կատարվում։ Այնքան զոհ, ինչքան արցախցին այդ մի քանի օրը տվեց, դուք ուղղակի երազում էիք, որ նրանք հետ չգան, ձեզ համար գլխացավանք չլինեն։ Դա էր ձեր ցանկությունը, դրա համար էլ նման հարցեր ունեք։ Դուք միայն մտածում էիք, որ այս ամենը փակվի, ավարտվի, որ դուք վայելեք ձեր իշխանությունը, շրջագայությունները, ձվածեղներն ու հեծանիվները։ Ուրիշ ոչ մի բան։
Այսօրվա իշխանությունը՝ ՔՊ-ն, Նիկոլը, ձեզ կոչեք՝ ինչ ուզում եք, ձեր լռությամբ, վարքով դուք հանցակից եք։ Իմանալով, որ Ռուբեն Վարդանյանին ու այդ մարդկանց որևէ մեկը չի ուղարկել, ուզում եք, որ ձեր սազանդարները դրա մասին խոսեն։ Իբր դուք չգիտեք, որ Ռուբենն այլևս քնել չէր կարող այստեղ, քանի որ գիտեր՝ ինչ է կատարվում Արցախում։ Սա է, ինչ այսօր կատարվում է այս մարդկանց հետ։ Սրա մասին է լուռ ճչում Ռուբեն Վարդանյանն իր հացադուլով»։
Կարդացեք նաև
Տաթև ՀԱՐՈՒԹՅՈՒՆՅԱՆ
